Bym biang jaka ïeng kali, mad ka sor Nongstoiñ ia ka jingdheng kali

Nongstoiñ: Ka Sor Nongstoiñ katba nangmih ki sngi bad ki por ka la sdang ban kiew bad roi stet bha baroh ki liang bad ka jingdon jong ki briew ruh ka la nang kiew na kawei ka snem sha kawei pat bad kane ka jingroi stet jong ka sor Nongstoin, ka la pynlong ruh ia kiba bun ki paidbah nongshong shnong jong ka thain West Khasi hills, ban iabeh sha kane ka sor la ka long ha ka kamai ka kajih ka khaii ka pateng bad ka pule puthi bad kiwei kiwei.

Namar ka jingsdang ban khapngiah kane ka sor ka la wanrah ruh ia ka jingdheng kali ha ki bynta jong ka pdeng sor Nongstoin khamtam ha ki sngi long iew bad kumjuh ha ki por step ba ki briew ki dang iabeh ka leit trei bad leit on skul ia la ki jong ki khun.

Haba phai sha ka jingdheng kali la sakhi ruh ba ka jur bha hapoh ka surok jong ka shnong Upper New Nongstoin bad kane ka jia jan manla ka sngi, khamtam ha ki bynta ba ha syndah jong ka Skul Anderson HSS bad ha kane ka surok ka jingdheng kali ka jur bha ha ki por step bad kane ka jingdheng kali ka la pynthut shisha ia ki nongiaid nongieng lyngba katei ka surok bad kumjuh ruh ia ki khynnah skul jong ka Anderson HSS.
Ym lah ban len ba ka jingdheng kali ha katei ka surok shnong Upper New Nongstoin kadei namar ka jingdon jong ki kali kiba wan on skul kiba sangeh ruh ha shi lynter jong ka surok hajan ka skul Anderson, hynrei la sakhi ruh ba katei ka jingdheng kali ka dei ruh namar ka jingkhapngiah jong kane kajuh ka surok ha nonbah namar ka jingdon jong ki kali kamai kiba ieng shilynter jong kane ka surok.
Kumta ban thaw lad halor kumno ban weng ia kane ka jingeh na ka liang jong ki Seng Samla ka shnong Upper New Nongstoin hadien ka jingaibor jong ka Dorbar Shnong, ki la ia mih da ka mon sngewbha ban pynbeit thymmai ia ka rukom iaid bad ieng kali ha katei ka surok khamtam ha kitei ki ar bynta kiba lah ban ong ba kiba long kidaw bah jong ka jingdheng kali
Shuh shuh na ka liang jong ki samla ka shnong Upper New Nongstoiñ ha kaba iadei bad ki kmie ki kpa ba wan on skul khun khamtam kiba wanrah kali ba kin pynieng noh hapoh ka kaw Mandiwat parking lot bad ki kyntu ruh ia ki kmie ki kpa ba kin ai ka jingiatreilang bad kine ki samla ki la mih ban pyniaid kali manla ka step ban pynbeit ia katei ka jingiaid kali katba haba iadei bad ka jingkhapngiah ha nonbah na ka liang jong kitei ki samla ki la pynkynriah noh ia kawei ka jaka ieng kali kamai kaba dei ruh ka stand porsohsat.