Bunkam ki paidbah, shwa ka pakhang shnong ka HNLC

Shillong, 13 Nailar:
Ka pakhang shnong ka HNLC ka la pynlong ia ki paidbah ban bunkam ban iabeh ia ki kam ki dup ban thied ia ki tiar. Ym tang katta, la mih ka jing sahkut kali kaba jur bha shwa ka kynta pakhang shnong. Hynrei uwei u rangbah u la pyntip sha u Rupang ha ka por janmiet, ba ki nongrep ha Iewduh ki la shah ktah jur namar ba la sah lut ki mar rep nalor kim don kudam ban set noh ia ki mar ba la wanrah.
Haduh 8 baje duna janmiet, une u rangbah uba don ha Iewduh, u la ong ba ka long kaba isynei namar ba ki nongrep ki la hap ban shong ban die ia ki mar rep hynrei kaba eh ka long ba kim don jaka set ruh ban leit buh ia ki mar rep jongki.
“Nga kwah ban pyntip ba u KHADC hapoh ka jingialam u Bah Ardent M Basaiawmoit ba kan peit lem ia kum kane ka jingeh jong ki nongrep khamtam haba don kum kane ka pakhang shnong”, la ong une u rangbah.
Ha kajuh ka por, ki jaka ha kylleng ka nongbah ki la khapngiah khamtam ha ka thain Motphran, Khyndai Lad ban iabeh sharum shaneng ban thied jingthied.
Ha ka jingshisha na ka liang ka sorkar ka la kyntu ia ki paidbah ban nym don kano kano ka jingtieng hynrei ban pyndep ia ka kam kumba ju long.
Ka sorkar ka la ong ruh ba ka la pynbiang ia ki bor pahara ha ka nongbah baroh bad ki paidbah ki dei ban mih khlem kano kano ka jingtieng.
Ka sorkar ka la pynmih hukum ruh ba baroh ki nongtrei sorkar ki dei ban ia mih ban wan trei thikna beit ha ka sngi pakhang shnong bad kumjuh ki iew ki hat ki dukan ki dei ban plie.
Ha kawei ka liang, ka la pynmih ia ka jingpynbna ba la pynbiang ia ki bos na ka bynta ban kit ia ki nongleit nongwan sha ka jingrakhe sngi laitluid sha Madan Polo ha ka 15 tarik.
Na ka jinglap u nongthoh khubor, ka pakhang shnong, ka trei kam bha, ha ki bynta jong ka nongbah Shillong, namar ba wat naduh ka por 8baje janmiet, la iohi, ba ki kali, ki la kynjah ha ki surok bah, lait tang katto katne kiba iaid ha ki thain Khyndailad.