Bun tam ki nongthep vote ha Khliehriat, khyndiat tam ha Pynursla

Shillong,10 Iaiong:
Katkum ka jingshim jingkhein ka tnat elekshon jong ka sorkar Jylla, la iohi ba na baroh ki nongthep vote na Shillong Parliamentary Seat, kiba bun tam ki dei na Khliehriat Konstitwensi; ha kaba ka jingwan poi ki nongthep vote ka poi sha ka 83.42%. Ka Khliehriat ka don haduh 32,887 ngut ki nongthep vote, kiba la wan thep vote ki don haduh 277,434 ngut bad haba ia khein Percentage ka poi haduh 83.42%. Nalor ka Khliehriat kiwei pat ki konstitwensi ba kham bun ki nongthep vote ki long ka Mawkyrwat kaba don 25,948 vote katba ki nong wan thep ki poi sha ka 20,927, haba ia khein percentage ka poi 80.65%, nangta bud sa ka Ranikor, 25,541 vote ba wan thep vote ki don 19,827 ngut, kaba long 77.63% , bud pat sa ka Sutnga Saipung kaba don 32,834 vote ha kaba kiba wan poi thep vote ki long 25,034 ngut, kaba long 76.24%.
Ka Pynursla ka dei ka Konstitwensi ba wan poi duna tam ki nongthep vote, na ka 29,096 ngut kiba wan poi ki long tang 15,319 ngut, haba ia khein percentage ka poi tang 52.65 %; nalor ka Pynursla kiwei pat ki konstitwensi ba khyndiat tam ki nongthep vote ha Shillong Parliamentary Seat ki long ka Mawlai kaba don 36,020 vote kiba wan poi ki long tang 19,010 ngut haba ia khein percentage ka poi tang 52.78%, bud sa ka Shella konstitwensi kaba don tang 21,846 vote katba kiba wan poi pat ki long 11,625 haba ia khein percentage ka long tang 53.21 %.
Haba ia shim jingkhein pat katkum ki District, la iohi ba ki nongthep vote ki duna tam ha East Khasi hills ha kaba ka jingwan poi ki nongthep vote ka kot tang sha ka 60.34%, ha Ri-Bhoi ka long 63.39%, ha West Khasi Hills ki poi haduh 65.80% katba ki nongthep vote kiba bun tam ki dei ha Jaintia hills (East bad West) ki poi haduh 68.60%.
Haba ia khein tang ha Shillong Parliamentary Seat ka jingwan poi ki nongthep vote ka poi sha ka 63.58 %, ha Tura Seat pat ka poi haduh 78.13%, haba kheinlang ha baroh kawei ka jylla ka jingwan poi ki nongthep vote ka long 69.03%. Ha Shillong Seat ki don haduh 9,79,521 ngut ki nongthep vote kiba poi thep vote ki long tang 6,22,760 ngut, ha Tura na ka 5,86,299 ngut kiba

wan poi thep vote ki long 4,58,085 ngut. Na baroh ar jylla napdeng 15,65,820 ngut ki ba wan poi thep vote ki long 10,80,845 ngut kaba pyni ba kumba 5 lak ngut ki khlem wan thep vote.