Bun tam ki kompeni Ri Bhoi, ba siew khajna sha KHADC

Shillong, 27 Lber:
Napdeng baroh ki district ba hap hapoh u pud u sam ka KHADC, ka Ri-Bhoi ka dei kaba bun tam kiban wan siew khajna sha ka Council. Ki don 128 tylli ki kompeni kiba hap hapoh u pud u sam ka KHADC. Ha Ri-bhoi ki don 111 tylli, ha East Khasi Hills 9 tylli bad ha West Khasi Hills ki don 7 tylli.
Ka Executive Member ba peit ia ka khajna, ka Kong Grace Mary Kharpuri ka la pyntip ia kane ha iing dorbar mynta ka sngi halor ka jingkylli ba la wanrah da u MDC ka Laitumkhrah u Bah Neil Sntonio War. Ka Kong Kharpuri ka la ong ba kine ki kompeni ki siew khajna sha ka Council ha ka dur jong ka jingioh, ki nongtrei jongki ruh. Kane ka dei ka lad pynmih khajna jong ka Council, la ong ka EM.