Bun kiba shu pynheh iew, halor ka UCC, ong U MR ka Jylla

Shillong:U myntri rangbah ka jylla u Conrad K Sangma u la ong ba ka Uniform Civil Code ne ka UCC kam pat dei kano kano, hynrei kiba bun ki la shu kren pynheh iew da kaba shu mutdur khlem pat iohi ia ka jingshisha.

Haba kren mynhynnin ka sngi, u la ong ba um pat lah ban ong ba u kyrshan ne pyrshah ia ka UCC, namar ba um pat iohi ia ka jingthoh ne ka draft jongka hynrei baroh kiba kren ki dei tang ki jingmutdur. U la ong ba lada ka UCC ka ong ba ka ri India baroh ka dei ban ai jait sha ka kynthei kumba ki Khasi bad Garo, hato yn pyrshah ia kata, bad khlem pep, ka jylla Meghalaya kan dei kaba nyngkong ban pdiang ia ka.

“Ka UCC kam dei eiei kaban ioh ban shu iaid suk ha ka ri kum ka India. Kaei kaba ong ka long ba ka UCC, lada peit ha ka jingpyrkhat, ha ka ri India kaba bun jait ki jaitbynriew kum ka India, ka long kaba eh”, la ong u Myntri Rangbah.
Haba ther ia kiba kren khlem tip ia ka jingshisha, u Conrad u la ong, kam long kaba dei ban shu mutdur khlem pat iohi ia ka jingshisha namar ba wat ia ka draft ka UCC ruh ym pat ioh, ym tip hynrei dei tang ka jingpan jingmut ka National Law Commission na ki paidbah.

U la buh jingkylli ia kiba kren murdur ia ka UCC da kaba ong, “Kaei kaban jia lada ka UCC ka ong ba ka ri India ka dei ban bud noh ban ai jait sha ka kynthei kumba long ma mgi (khasi bad Garo), hato ngin pyrshah, nga ngeit ba ka jylla Meghalaya kan dei kaba nyngkong ban pdiang ia ka”.
Lah ban kdew ba ka Kerala, ka la shim da ka rai ban pyrshah ia ka UCC, katba kiwei ki jylla kum ka Mizoram bad ka Nagaland ruh kila pynpaw ia ka jingpyrshah ia ka UCC.