Bun kiba pdiang burom ia u samla Lionel Daryl Rymmei, uba la ioh ia ka nam rang ap kol ba tbit ha ka U-19 jong ka SAFF

Nongpoh: Ha ka sngi ba u samla Lionel Daryl Rymmei, u la wanphai sha ka jylla, hadien ba u la mihkhmat na ka India, ha ka lympung ialehkai phutbol U-19, ia kaba la pynlong da ka South South Asian Football Federation (SAFF) ha Nepal, ki la don ki katto katne ki kynhun, kiba la pdiang burom ia u ha ki katto katne ki jaka ha Ri Bhoi.

Ka jingpdiang bad pynkup burom ia utei u samla, ka dei ruh hadien ba ka India ka la long kum ka lahduh ha katei ka lympung ialehkai phubol, kata hadien ba ka la lah ban pynliem noh ia ka Pakistan da 3-0 bad ba u samla Lionel Daryl Rymmei, u la long kum u rangapkol ba kynsai ha katei ka lympung ialehkai, kaba la shimbynta da ka ri Bangladesh, Bhutan, Maldives, Nepal bad Pakistan.

Haba phai halor ka jingpdiang bad pynkup burom ia utei u samla, nyngkong la pdiang sngewbha da ka Federation of Khasi Jaintia & Garo People (FKJGP) ha Jorabat, nangta ka Young Minds Association (YMA) ha Umran, katba ka Ri Bhoi District Sports Association (RBDSA) lem bad ka Confederation of Ri Bhoi People (CORP), ki la pdiang burom ia utei u samla lem bad kiba haiing jong utei u samla, ki la pdiang burom ha Umsning.