Bun kiba mut, ba dei ka proseshon bret blei

Shillong, 11 Risaw:
Tang mar ia rung u Chief Executive Member ka KHADC hapoh Iewduh la sawa jam ki jingput tangmuri bad ka ksing ka dhah ban pdiang burom ia u ryngkat ki para MDC jong u, kiba la wan synran. U CEM u la rung hapoh Iew da kaba iaid lynti na Parking Lot Khliehiew ter ter sha Motphran, sha Iew mawlong, basa sohsaw bad u la mih biang sha Khlieh iew ban leit sha ka jaka pynlong jingialang sha Thanad Syiem Mylliem.
Katba u CEM u dang iaid lynti ryngkat ki para MDC jong u la ialam lynti nakhmat da ki pulit Syiem ryngkat ki nongtem nongput ki ba la tem la put khlem sangeh haduh ba un da poi sha jaka long jingialang. Bun ki bar jylla kiba mut dur ba katei ka ksing ka dhah ka dei ka jingiaid proseshon ki riew ngeit Hindu shuwa ba kin leit bret blei. Hynrei haba ki bar jylla ki iohi ba ym don blei kumba ki la mutdur ki la tur shakhmat ban kylli jia aiu, ba la mih kat kata eh ka jingput jingtem. Katei ka la pynsammut ia kiba bun balang ha Iewduh mynta ka sngi.