Bun ki tiar ki la jah & pra lut, ong kaba shah pynpra iing ha Mawtari

Shillong, 12 Naiwieng:
U Bah M Kharmalki u trai jong ka sem masi ba shah pynpra ha ka sorkar MUDA u la iathuh ba ka sem masi jong u kaba don ha Mawtari ka la shah pynpra noh ha ka MUDA bad mynta ula shu hap ban shna ban tap da ka tyrpa ban da ia ki masi jong u.
“Ka jingwan pynpra jong ka MUDA ia ka sem masi ka dei ha ka por ba nga dang leit bylla bad ynda nga la wan phai nga la iohi ba ka sem masi ka la pra lut bad kane ka la pynkyndit ia nga bad ka la ktah jur ia ka mynsiem jong nga”, la ong u Bah Kharmalki.
Ha kajuh ka por ka Kong Philamon Lyngdoh kaba la wan ban shong kyrain bad la I khun ha Khyndailad ka la pynpaw ka jingsngewsih kthang halor ka jingshah pynpra ka iing jong ki ha ka MUDA.
Ka jingwan pynpra jong ka MUDA ia ki iing ki sem bad mynta la shu sah sakma ban hap leit pan iing basa na ki ba ha iing ba ha sem katba ki sngew synei.
“Ngi la shu phet sakma sha iing kiba bahaiing bahasem bad ka ja ka doh ngi la shu iabam katba ioh”, la ong ka Kong Philamon.
La iathuh ruh ba katba ka dang don ha iing syndet syndet ki la wan ban pynpra ia ka iing ka sem jong ka naduh ki tiar ki tar ki la bun kiba la jah la pra lut.
Ha ka jingwan jurip jong u Rupang mynta, ka sngi la lap ba bun ki iing bad ar tylli ki sem masi kila pynpra lut ha ka MUDA bad la iohi ba ki iing kiba shah pynpra kidei ki iing kiba la shna da ki dieng ki siej bad la sop da ki tin.
Ha katei ka jingshah pynpra la iohi ba don artylli ki sem sniang kiba la lait na ka jingshah pynpra ha ka MUDA, hynrei iaki sem masi la lap ba ki la shah pynpra haduh ba la hap ban shu ker da ka turpar.
Lah ban kdew ba ha ka 8 tarik mynta u bnai ki nongtrei ka MUDA ki la leit ban pynpra kumba 6 tylli ki iing sah briew kiba kynnoh ba kidei ba ki shong beain ia ka jaka sorkar.Ha katei ka jingleit khynra ia ki iing la leh hapoh ka jingialam jong lai ngut ki majistor kiba kynthup u Bah DM Wahlang, I Majaw bad u N Hajong.
Ha katei ka sngi ka Kong Agnes kaba la leit ban iada ban ai jingiarap ia kitei ki briew kiba shah pynpra ia ki iing ki sem jong ki ha ka MUDA hynrei ka la shah kem noh hadien ba ki nongtrei jong ka MUDA ki la ujor pyrshah ia ka.