Bun ki nongshongshnong ki bym pat sngewthuh ia u Even bad u Odd number, Balei ki Pulit kin shu dain kuna noh ia ki?

Scholar Lawriniang
Nongthliew WKH.

Haba ka Sorkar jylla ka la pynbna paidbah ban shah iaid ia ki kali kamai 50% bad kali riew shimet 50%, bad ia kane yn pyniaid ruh da ki odd bad even number. Ha ka 12 tarik Jymmang 2020 la mih ha kot khubor “Na ki even number na Laitlyngkot, kamai ki pulit T.50,000” haduh 25 tylli ki kali kiba don ia u even number ha ka ki la shah dain kuna ha ki pulit ka Pynursla Police Station namar ba ki dei kin ki kali ba kut (ending) ia u even number (0.2.4.6.8) bad ha kane ka sngi ki dei ban iaid ki kali bad don ia ki odd number.(1.3.5.7.9) Kane ka jingdain kuna ka ktah shibun eh ia ki paidbah bapli ba dang duna ka jingnang jingtip shaphang ki even bad ki odd number khamtam eh ha kane ka por hiran khim khait ba don ka lockdown mynta.

Lada ngin ia kren ia ka jingshisha kum ba ka paw hapoh jylla Meghalaya ki ba bun hi ki nongshongshnong khamtam na nongkyndong ki bym tip ne sngewthuh shaphang kita Even bad ki odd number. Kiei kita ki even bad ki odd number? Ia kane nga sngewthuh bad nga mad haba nga bat kum u wei na ki ba ju ia trei ia ki kam shnong kam thaw hapoh shnong. Kumta tang namar ka jingduna jingtip yn shu shah shim kabu noh da kaba shah dain kuna kane kam sngewiahap, ha ka jingshisha la dei ban hikai pynban ia ki ba kin tip.

Hooid lada kren ia kata ka jingbakla hi baroh ka dei ka jong u paidbah, ha lehse bapli ioh ba kim tip shisha pat ia u odd bad u even number, shu don ba iathuh ne batai mano re mano, ne Hato ki tip tangba ki leh khnang ne? Tangba bakla ka iaid ka ieng ban shu pynhap kuna noh ia ki paidbah bapli nga sngew ka long kaba bakla. Ha kum kane ka por ban dain kuna hap da pyrkhat arsien arwat lem ia ki duk ki suk bun ki ba ym don pisa wat ban thied khaw thied dawai, wat na ka liang ka sorkar ruh ka iarap bad isynei ia u paidbah bapli wat u khaw rashon ka ai ei khlem jingsiew pisa, ki bor pahara pat lada tang shu bakla khyndiat la dain kuna.(Ong noh bapli wat ban thied khaw la syrtok ka pisa, lane pynlang pisa ba mut leit thied bam bym don bam shuh ne thied dawai ba pang, phew se ynda poi ha jaka ap pahara la shah dain kuna noh tang namar ba kum ialeh pyrshah ne bym tip ia ki ain. Lada ka jia ba ioh dain kuna ia kum kita, da ei pat bapli kin thied khaw jhur thied dawai shuh? Hato mano ban niad ia ki ummat jong ki ha kum kata ka por?) Ha ka jingshisha ki pulit haba iohi ia kum kane ka jingjia ba ki iaid ki kali bym dei ki ending number ki dei ban shu pynphai mardor noh ia ki ba kin leit phai sha iing bad ban ym shah iaid, hynrei ym ban dain kuna ia ki.

Bad ha ka juh ka por ngi buh ruh ka jingkyrpad ia ka sorkar jylla ba kan weng ia kum kane ka kyndon kaba ktah ia u paidbah, ha ka long briew man briew don beit ka bakla, khamtam ha ki bym tip eiei ia kita ba la bthah ka sorkar, namar ha meghalaya hi ym ba don kali tang ki ba nang ba tip ki ba bun ki bym tip iu A iu B ruh ki don kali na ka bymtanka jingdonkam jong ki. Kumta ban wanrah ia ka jingiatrei lang hapdeng ki paidbah nongshongshnong bad ka sorkar dei ban weng mardor ia katei ka kyndon lane ain.