Bun ki nongkyrshan, ki khlem thep NPP, ong u Ma Sniawbhalang

Shillong:U National General Secretary ka National People’s Party (NPP), u Bah Sniawbhalang Dhar u la ong ba ki don ki nongkyrshan jong u kiba khlem thep sha ka NPP, namar ki ong khlem ïaleh ma u.

U la ong ba ka jingjop kput ha ka MP election da kawei ka seng kam dei kaba dang thymmai, namar wat ha u snem 2019 ruh ka Congress ka la tam kput ia u kyrtong mon lang ka MDA.

U la ong ha u snem 2019 baroh kiba don ha ka Sorkar MDA ki iakhun pyrshah ia u Bah Pala, hynrei u kyrtong ka Congress u jop ha baroh 35 tylli ki LA constituency da kaba u la ioh haduh kumba 4 lak 20 hajar vote, hynrei ha ka election MLA 2023, ka Congress ka la jop tang 4 ngut ki MLA na Khasi Jaintia.
U Bah Sniawbhalang uba dei u Symbud Myntri Rangbah, u la ong ba ha ki paidbah ka election MP, MLA bad MDC ka iapher, bad bynrap ba u paidbah u dei uba shalak bha bad ym dei ban kheiñ thala ia ki nongthep vote.

Na ka liang u nongialam ka NPP u la ong ba u burom ia kaei ka rai kaba u paidbah u la ai, bad ha kajuh ka por u la kitbok ruh ia u MP ba la shah jied thymmai, u Dr Ricky AJ Syngkon.
U la ong ba ha ka election ka jingjop bad ka jingrem ka don beit, bad ai khublei kyllum ia ki paidbah nongshong shnong kiba la ai ia ka rai jong ki ha ka MP election, bad ai khublei kyrpang ruh ia ki nongkyrshan ka NPP kiba la treishitom watla ki khlem lah ban pynpoi sha ka thong.