“Bun ki lad ban kyntiew ia ka synshar paidbah”

Shillong 27, K’lyngkot:
Ki don bun ki lad kiba lah ban kyntiew ia ka synshar paidbah, la ong u secretary general barim ka Rajya Sabha u Dr. Yogen dra Narain (IAS) haba kren ha ka phang, “Jing shim bynta ha ka synshar paidbah’, ba  la pynlong da ka Meghalaya Institute of Governance (MIG) mynta ka sngi Balang ha Meghalaya Secretariat.
U Dr. Yogendra u la ong, ‘’Ki don shibun ki daw kiba lah ban pynkiew ia ka synshar paidbah ha ka ri kynthup ki buit teknoloji, jingpynshai halor ki ain, jingthaw ia ki ain, wanrah ia ki paidbah ha ka jingthaw ia ki rai, ka jingai jingkhein kaba shai, ka jingkyntiew ia ka jingshim bynta ki seng bad ka jingpynkup bor ia ki briew ba duna kiba rit bad ka jingpynsaphriang ia ka pule puthi’. U Dr. Yogendra u la ong ba ka thain shatei mihngi ka India u la ong ba ki don ki rukom synshar kiba bha kiba ai bor sha ki paidbah. Kane ka pyni ia ka jingsynshar ba bha ha ka synshar paidbah.
U la kren ia ka jingong u Myntri Rangbah u Narendra Modi uba pyndonkam da ka buit teknoloji kum ki Twitter bad Facebook. U Dr. Yogendra u la ong ba ka pyrthei mynta lyngba ka juk teknoloji ka lah ban ai ia ka rynsan sha ki briew ban iasam ia ka jingsngew jongki halor ki mat bapher bapher.