Shillong:Hynnin ka sngi, ki ophisar ba la phah da ka sorkar jylla, ki la iakynduh ia U ADC jong ka Mandya bad ha katei ka jingiakren, ka la poi ka rai, na ka bynta ban pynlong ia ka jingtohkit bad ka la poi sha ka jing ia mynjur ban aiti ia ka kaiphod, kaba dei halor ka ejahar sha kiba donkti, ki kyrteng jong ki khynnah kiba ioh pang bad sa ka bam kaba ki ioh bam bad kiwei ki jingdonkam ha katei ka jingjia bad la thung ruh hynnin hi ka sngi, ia U Deputy Director of School Education, ba un iarap ha katei ka jingtohkit bad la ialam ruh ia kitei ki ophisar sha hospital, ha kaba ki la iathuh ba kumno ki leit poi sha katei ka skul bad nangta sa ka jaka sah jongki.
Ha ka jingwan jong U Commissioner and Secretary ka tnat kam pohiing ka sorkar jylla jong ka Meghalaya, ula iakynduh ia U DC jong ka Mandhya District lem bad U SP bad sa kiwei de ki briew jong ka sorkar bad hadien kata, ki la iakynduh ia ki bor pyniaid jong ka tnat Child Protection Department and Education Department, jong ka Karnataka bad ki la shim ruh ia ka rai ban leit jurip ia ka skul bad ka hostel, kaba la jia katei ka jingjia kaba sngewsih bad ki la iakren ruh ia u doctor, uba sumar ia kitei ki khynnah.
Mynta ka sngi, ka la don ka jingialang, kaba la pyniaid da U Deputy Commissioner ka Mandya District, ha kaba la don lang da ki ophisar jong ka Education Department, Child Welfare Committee, ha kaba la don lang U President bad ki Nodal Officer lem bad ki dkhot, nangta U President ka Juvenile Justice, ki District Backwards Officer, Social Welfare Officers and Hostel Nodal Officers, Zila Panchayat Executive Officers lane ki Chief Executive Officer lem bad U SP ka Mandya District bad sa kiwei de ki nongtrei jong ka district.
Ha katei ka jingialang, la iarai ruh ba ki bor District jong ka Mandya, ki ai jaka sah noh ia ki 22ngut ki khynnah skul sha kawei pat ka jaka, ha kaba yn peit hapoh ka jingpyniaid jong u Child Protection Officer, hadien ba ki la mih na hospital bad kin da peit bha ruh ia ka jinglong jong ka bam jong kitei ki khynnah, ba kan long, katba kum ka jingbthah jong u doctor uba sumar ia ki bad la iathuh shuh shuh, ba mynta u bnai, ka dei ka eksamin kut snem jongki, kumta kan dei ka kamram jong ki bor district, ba kin ai jaka ialeh eksamin ia ki, ha katei hi ka jaka kaba ki shong ki sah lane ka Bala Mandir Center.
Hadien katei ka jingialang, ki la iakynduh ruh ia u Chairman jong ka Karnataka State Commission for Protection of Child Rights bad ha kaba ki la leit jurip ia katei ka jaka, kaba ka don katei ka jingjia bad kumjuh ia ka hospital, ha ka jingdon ryngkat U DC ka Mandya District bad la iathuh ba ka koit ka khiah jong kitei ki khynnah, ka la nang kham bha mynta, lait noh tang uwei uba dang don ha ka jingshah sumar ha ICU.
Phi don ban ong eiei?