Shillong:Halor ka jingiap jong uwei u khynnah rit, uba dang 13 snem ka rta, uba na ka shnong Lyndem, jong ka Pynursla Civil Sub Division, U Rupang, ula pyrshang ban iit ia ki jingthoh na ki kotkhubor bapher, kiba la pynmih ia katei ka jingjia kaba sngew sangsot ia ki khynnah Khasi, kiba dang leit pule sha ka jylla Karnataka.
Ka India Today, ha ka jingpynmih khubor jongka, ka iathuh, ba utei u heprit uba iap, u dei uba kyrteng U Sunday Kerlang, uba na Lyndem, kaba hap ha ka Pynursla Civil Sub Division, East Khasi hills District bad la iathuh ba hynnin ka sngi, ka 16tarik Lber, utei u khynnah rit, ula kyllon ha ka jaka soh jongu bad haba la leit rah sha hospital, la iathuh, ba ula dep iap lypa bad katei ka khubor, ka iathuh ba U Kerlang, u dei uwei na ki 30ngut kiba bam ia ka jingpang, kaba la bret da ki briew, kiba ia bam khana holi, ha ka skul Gokula Vidya Samsthe, kaba dei ak skul jong ki riew shimet, ha ka shnong T Kagepura.
U Superintendent of Police, jong ka Mandya, U Mallikarjun Baladandi, u iathuh ba katei ka skul, ka la plie naduh u snem 1989, hynrei kam pat ioh jingbit ban shna ia ki jaka sah. “Katei ka skul, ka dei kaba treikam beain bad ka buh ia ka hostel, ha ka mala kaba nyngkong bad kam don ia ka iing kaba biang, ka jaka leit shabar jongki khynnah ruh” ong U Baladandi. Na ki 30ngut ki khynnah, kiba iohpang na katei ka bam, kaba la bret, ki kynthup ia 24ngut na Meghalaya bad ki don 7ngut kiba pang jur, ha kaba uwei u don ha ka jingshitom bha ban ring bad pynhiar mynsiem.
Ki pulit, ki lap ba katei ka skul, ka ai ia ki jingbam kiba la bret na ki jingleh khawai na ki tamasa, kiba la pynlong shatei shajan bad ha ka 14tarik Lber, la ai ia ka ja pulaw bad kiwei de ki jingpang jhur, kiba la bret, da kito kiba iabam khawai holi bad U Baladandi, u iathuh ba ki la pynngat ia kitei ki nongpyniaid jong ka skul, ha ka Section 286 (Negligent conduct concerning a poisonous substance) bad sa ka Section 106 (Causing death by negligence) jong ka ain Bharatiya Nyaya Sanhita bad ki la kem ia 3ngut ki briew, kiba kynthup ia u nongshet, ia u nongpyniaid jong katei ka hostel, uba sam ia katei ka bam, khlem da peit bha bad ia u trai jong katei ka skul.
Ka kotkhubor online kaba na Assam, ka Dy365, ka iathuh ba kiba iohpang, ki dei ki khynnah kiba na Nepal bad na Meghalaya bad kiba pang ia katei ka jingbam, kaba la bret, ki ioh pang prie, kim lah ban ring bad pynhiar mynsiem bad ka tyrkhong ka met jongki.
Ka kotkhubor Hindustan Times, ka iathuh ba kitei ki khynnah, ki iohpang hadien ba ki bam ia ka jingbam, kaba ki la ioh na ka jinglehkmen holi bad la iathuh ruh ba katei ka skul, kaba kyrteng ka Gokula Vidya Samsthe, kaba don ha ka shnong T Kagepura, Mandya District, ka dei kaba la plie naduh u snem 1989, tangba kam don ia ka jingioh jingmynjur, ban buh hostel ha katei ka jaka bad katei ka skul, ka don 202ngut ki khynnah skul, kiba pule naduh ka kyrdan LKG haduh Class 8 bad la iathuh ba katei ka skul, ka ju don ka jing ia pynbeit, ha kaba ia ka bam kaba sah ne kaba la bret na ki kam khawai, ki jingialeh tamasa bad ki jingiathoh la ju phah sha katei ka hostel, ban ai bam ia ki khynnah skul.
Phi don ban ong eiei?