Bun ki khynnah, kiba ioh delta virus ha Dibrugarh

Guwahati: Ka kylla kaba ar jong ka khlam covid, ka ktah jur bha ia ki khynnah rit, kiba hapoh 18 snem ha Dibrugarh District jong ka Assam.

Ha une u bnai, ki don 5ngut ki khynnah, kiba iap na ka khlam covid 19 bad lai ngut na kitei, ki dei kiba don bad kiwei ki jingpang ruh. Ha ka sngi saitjain ba ladep, uwei u khyllung, uba khadwei bnai, ula iap noh, ha ka Assam Medical College Hospital (AMCH).

U Dr Aditi Baruah, Associate Professor jong ka tnat Pediatric, u iathuh ba ki don 60ngut ki khynnah, kiba la shah sumar haduh mynta ha katei ka hospital jong ka AMCH bad 5ngut na kitei ki la iap noh.

U Dr Nabajyoti Gogoi, uba dei u Dibrugarh district surveillance officer of Integrated Disease Surveillance Programme, u iathuh ba kiba bun, na kiba ioh pang, ki dei kiba don ia ka delta virus bad la iathuh ruh ba ki don 2,300ngut kiba ioh ia katei ka jingpang, naduh ka 1tarik Iaiong 2021.