Bun ki jingleh kput bad kwah burom palat ki nongmihkhmat

Albert Maring

Ka jinglong jingman jong ka sain hima sima hapoh ka jylla ha kine ki sngi mynta, bun tang ki jingialeh kput bad ka jingkwah burom palat hapdeng ki para nongmihkhmat, kata hapdeng ki nongmih khmat kiba don ha ka liang synshar kiba don ha ka sorkar bad kita ki nongmihkhmat kiba don ha ka liang pyrshah. Kane ka jingleh kput bad shah leh shilliang khmat ka jur bha khamtam ha ki constituency jong ki nongmihkhmat kiba don ha ka liang pyrshah, wat la bun sien ki nongmihkhmat ki ju pynpaw bad pynsngew ia ki jingeh jingdonkam jong ki paitbah ka constituency, hynrei la shu lehklet bad shah pynsyllang pynban ha kita kiba bat ia ka bor synshar kum u myntri Rangbah bad ki myntri sorkar kiba bat ia ki tnad treikam bapher bapher wat la ki paitbah ki donkam shisha ia ki kam pynroi, hynrei tang namar ba ki dei na ki constituency jong ki MLA ba don ha ka liang pyrshah. Kane ka paw ba ka jingburom ia ki para nongmihkhmat kam don shuh.

Ka dei ka kamram jong ka sorkar lyngba ka jingdon jong ki nongmihkhmat kiba bat ia u lakam synshar hapoh ka sorkar jylla ban peit ia ka bit ka biang ki jingdonkam jong ki paidbah nongshong shnong ka jylla hi baroh kawei, ban wanrah ia ki kam pynroi ba ki paitbah ki dei hok ban ioh, ym ban shu ai kam pynroi tang ha ki constituency jong ki nongmihkhmat kiba don ha ka liang synshar kata kaba bakla shibun. Ka jingdon jong ka liang pyrshah ka iarap ban ioh ia ka sorkar ka ba trei hok ban ioh ia ka synshar kaba khuid, khnang ba kita kiba don ha ka liang synshar kiba ialam ia ka sorkar kin ym iohlad than ban leh katba mon, ka liang pyrshah kiba don ka bynta kaba khraw, ka long kum ka nongkdew lynti haei ka don ka jingduna jingbakla bad jingdkoh treikam jong ka sorkar ban long kum ka nongpeit pyrman ia ki jingtreikam jong ka sorkar.

Ban long nongmihkhmat ka long ban shakri ia ki paidbah ha ka constituency, hynrei haba long myntri rangbah, myntri sorkar ka dei ka kamram ban peit ia ka jylla hi baroh kawei, kane ka jingialeh kput bad leh shilliang khmat hapdeng kita ki nongmihkmat kiba don ha ka liang synshar bad ki nongmihkhmat ha ka liang pyrshah, ka la long kum ka raibi kawei ka sorkar hadien kawei pat tang ka jingiabuaid bor bad kwah burom palat jong ki nongialam, i kumba kim don por shuh ban trei na ka bynta ka bit ka biang jong ki paidbah ban kyntiew ia ka jylla, ki la shu bunkam tang ban iaknieh bor iaknieh shuki tang kumno ban ioh thaw pisa ban myntoi ialade shimet ia kiba ha iing hasem bad katto katne ngut ki nongkyrshan ba hakhmat. Kane ka jinglong jingman ha ka jylla ka jia ka daw na ka jinglyngkot ka jingmut jingpyrkhat bad ka jingduna ha ka rynieng ryniot jong ki nongialam. Tang na ka daw jong ka jingialeh kput bad kwah burom palat jong ki nongialam ka wanrah pynban ka jingsah dien ia ka dong ka thain bad ka jylla.