Bun ki ioh mynsiem, na U Amit Shah

Shillong, 8 Jymmang:
Ka jingwan iuhkjat u president ka BJP u Amit Shah ha kane ka jylla ka la ai mynsiem shibun ia ki nongialam, ki dkhot ka seng bad wat ia ki nong kyrshan.
Kat kum ka jingia kren bad ki nongialam ka BJP ha kane ka jylla, ki la iathuh ba hadien ba la wan u Amit Shah, ki paidbah nongkyrshan ka party ki la ioh mynsiem bad kim ngeit shuh ia ka jingkren pyrshah jong kiwei ba ka BJP ka dei ka seng pyrshah niam.
“Ngi la ioh ia ka jingkren na kiba bun ki nong kyrshan ka seng, ba ki sngew ioh mynsiem hadien ba la ioh sngew ia ka jingkren jong u president rangbah ka BJP haba u wan ha kane ka jylla”, la ong ka khubor na ka BJP. Halor ka jingkylli la ki sngew kumno halor ka jingpakhang shnong ha ka por ba wan u president, ki nongialam ka BJP ki la ong ba u Amit Shah haba u iuh kjat ha Shillong bad iaid ha surok u la mut dur ba ym don briew shuh ban wan sha ka jingialang jongu. “Hynrei hadien ba u la iohi ha ka jingialang ba la wan poi da ki hajar ngut ki paidbah, u la sngewthuh ba ka jingwan jongu ka long kaba seisoh”, la iathuh u dkhot ka BJP. “Mar syn iohi ba shlei ka kamra jingialang,u Amit Shah u la sngew tynnad bad phuh samrkhie”, la iathuh u nongialam ka BJP.