“Bun ki hati khlaw, ia ki Khasi”

Shillong 2 Nohprah:
U Lyngdoh ka Hima Nongstoin u Bah Macmillian Byrsat u la ong ba katkum ka khana sumari ka ri India, lada khein, ia ka jingdon paid jong ka jaitbynriew Khasi, dang kham bun ki hati khlaw.
“Kaba lyngngoh ka long ba ki Hati Khlaw ki ioh ia ka jingiada kyrpang da ki ain jong ka sorkar India hynrei ka jaitbyn riew Khasi pat, kam shym la ioh ia ka jingiada kyrpang da ka ain jong ka sorkar India”, la ong u Bah Byrsat haba kren mynta ka sngi ha jing ialang jong ki khlieh nongsynshar ha u Soso Tham Auditorium, Shillong.
U Bah Byrsat u la ong, “Dang kham bun ki hati khlaw ia ka jingdon paid ka jaitbynriew Khasi, lada ka sorkar India ka ai jingiada kyrpang ia ki hati khlaw da ki ain ba khlain, balei pat kam shym la ai jingiada kyrpang ia ka jaitbynriew Khasi”, la ong u Bah Byrsat.
U la ong ba ka dorbar ki khlieh nongsynshar ki la iakhun ban ioh ia ka jingithuh ba kyrpang na ka sorkar India ban iada ia ka jinglong kyrpang jong ka jaitbynriew da kaba thaw ia ki ain ha ka khyrnit ka synshar paidbah hynrei haduh mynta kam pat shym la ioh jaka satia.
“Hooid, ka long kaba sngew tynnad khyndiat ba ka sorkar India dang shen lyngba ka tnad kam pohiing ka Home Ministry ka la tyrwa ban pynduh ne weng noh ia ka kyndon 12 (A) jong ka 6th scheduled ka riti synshar khnang ban pynkhlain ia ki district council”, la ong u Lyngdoh ka Hima Nongstoin.
Ha kane ka sngi la wan ban iashim bynta da ki khlieh nongsynshar bapher bapher na ki Hima, ki raid, ki shnong ba la ialam da u Bah John F Kharshiing.
La don ruh ki nongialam sengbhalang kynthup na ka FKJGP, KSU, HNYF bad kiwei kiba la wan ban iashim bynta ha kane ka jingialang jong ki khlieh nongsynshar.
Ha kane ka jingialang la shim ruh ia ka rai ban kyntu ia u Myntri Rangbah ka jylla ban khot ia ka dorbar thawain ka jylla ban iakren ban pynrung ia ka dulir iateh bad ka sorkar India ka Instrument of Accession (IoA) ba la soi da ki 25 Hima ha ka 17 tarik Nailar, 1948, ban thaw ia ka Fedetaral ne Regional Council na ka bynta ki Khasi, Jaintia bad Garo, ban pynbeit noh ia u pud u sam hapdeng ka Meghalaya bad ka Assam bad hapdeng ka India bad ka Bangladesh, ban nym pyntreikam ia ki ain ka sorkar India kiba pyrshah ia ka rukom pyniaid bad ki riti dustur ka jaitbynriew Khasi, bad Garo ha kane ka jylla nalor kiwei pat kiba iadei bad ka ioh ka kot, ka mariang.