Shillong: Ka jingkynnoh ka Congress ba ka sorkar Meghalaya Democratic Alliance (MDA) kam don ka jingkitkhlieh ia u pud u sam hadien ka jingjia ha New Balakhawa, Ri-Bhoi, ka la pynbitar ia u Symbud Myntri Rangbah ka jylla u bah Prestone Tynsong.
Dang shen, u nongialam ka liangpyrshah u Dr Mukul Sangma u la kynnoh ba ka sorkar MDA ka dei ka bym don ka jingkitkhlieh ia ki paidbah bad ka jylla bad ka jingjia ba shah hiar thma ka iing u secretary ka Hima Nongspung u bah Michael Warjri bad ka jingshah kem jongu ha ki pulit Assam, ka dei ka jingpyndem ka sorkar Meghalaya ha ka sorkar Assam.
“Lada ka Congress ka kynnoh ba ka MDA kam leh eiei ia ka kam khappud, to ngin leit phai dien sha ka por ba la dep, ka sorkar Meghalaya United Alliance (MUA) ka synshar ia ka jylla kumba 15 snem bad kumjuh ka don ka sorkar Congress ha Assam ba long u Tarun Gogoi. Hangne ha Meghalaya la synshar ka MUA ba ialam u Dr DD Lapang bad hadien u Dr Mukul Sangma”, la ong u bah Prestone.
U la ong ba naduh ba u jop elekshon nyngkong ha u snem 2003, ‘bun ki snem la synshar ka Congress ha kane ka jylla.
“Ka jingkynnoh ka Congress ka long khlem jingkitkhlieh”, la ong u bah Prestone.
U la ong ba halor ka kam iakajia pud, ki myntri rangbah ka Meghalaya bad u Myntri Rangbah ka Assam, kin iashong hadien ka elekshon MP ban iakren ia kane ka kam.
Ka congress ruh ka khlem leh eiei haki bun snem ki jing synshar jong ka balei kdew kti iaka sorkar khyllung badang shi snem tam. Wat kdew ia kiwei namar khyndai shympriah ki thew ialade. Lah dei ban buh saka border boundary line area department bad ban don ka department bad u minister ban shim ka jing kit khlieh.