Bun ki bar jylla ban ia ki Khasi kiba trei karkhana ha Umiam

Nongpoh: Ban tip halor ka jingiohkam iohjam ki khun samla Khasi ha ki Karkhana bapher bapher kiba don ha Undustrial Area ha Umiam, hynne ka sngi ki nongialam ka Hyn niewtrep Achik National Movement (HANM), Employment Cell ka Sengkmie, ki la leit ban hiar jurip sha kiba bun ki Karkhana kiba don ha katei ka jaka bad lyngba katei ka jingleit jurip, kitei ki HANM, ki la lap ba ka jingdon ki nongtrei ha katei ka jaka la tam da u bar jylla ban ia ki samla Khasi, kiba la iohlad ban trei ha kitei ki karkhana.

Ha katei ka jingleit hiar jurip, ki nongialam ka HANM, Employment Cell, la lamkhmat da u Bah Louis Doh tdong kum u Chairman bad uba dei ruh u Asst. Secretary ka sengkmie, ia kaba la synranlang ruh da u Bah Pateng Myrsing, President ka HANM Ri Bhoi Distrik lem bad kiwei de ki nongkitkam bad ki dkhot ka HANM na ki Unit bad Circle bapher bapher.
   Haba iadei bad katei ka jingleit jurip, ha kaba kitei ki HANM, ki la ioh ban leit wad jingtip na ki Karkhana Otdieng bad ruh na ki Karkhana shna Kyiad, u Bah Louis Dohtdong, haba kren sha ki lad pathaikhubor, u la pynpaw ia ka jingsngewkhia, namar ha katei ka jingleit jurip ka jong ki la lap ba ka jingdon jong ki nongtrei ha kitei ki karkhana, la tam da u bar jylla haba ianujor bad ki samla Khasi.   

   U la ong ruh, ba ka nongrim kaba la pynlong ia ki nongialam ka seng ban leit jurip sha kitei ki Karkhana, ka long ban tip halor ka thungkam thungjam ha kitei ki Karkhana, ha kaba ka seng ka da kwah eh ba ki khun samla Khasi ki dei ban ioh trei ha kitei ki Karkhana, kaba long kum kawei na ki lad ban iohkam iohjam ia ki khun samla Khasi bad khamtam eh ha kaba kum kane ka por ka jingiakhun ia ka khlam COVID-19 bad baroh ki samla ba trei sha kiwei ki jylla, ki la wanphai sha la ka jong ka jylla.

     Lyngba katei ka jingleit jurip sha kitei ki jaka ba don ki Karkhana, utei u Nongialam ka HANM, u la ong ruh ba ka seng ka sngewkhia ban tip ba ki don shibun ki samla Khasi kiba la leit ban trei ha kiwei pat ki jylla tang namar ba kim iohkam hapoh ka jylla, ha kaba ka seng ka suba ruh ba ka lah ban don ka jingshah lehbein ia ki samla Khasi bad kaba la pynlong ia ki ba kim ioh ban trei ha kitei ki Karkhana, namar na kaei kaba la lap da ka seng, ka long ba la bun ki bar jylla ban ia ki Khasi kiba trei ha kitei ki karkhana.

      U la ong ruh ba ka seng kan nym shongkli kti, hynrei kan dang wad jingtip bad trei shitom na ka bynta ban pynioh ia ka hok jong ki khun samla Khasi kiba shu shong khlem kam khlem jam, namar kumba ka long mynta ki don shibun ki samla Khasi, kiba lah ban trei ia ki kam ki jam kaba la trei da ki bar jylla ha kitei ki Karkhana kiba don ha Umiam.