Bun ki babu LP, kiba kyndit bad poi Hospital, ba shah weng kam

Shillong, 5 ‘lyngkot:
Ka jingshah weng kam jong ki 144ngut ki nonghikai Lower Primary, kiba la thung da kaba pyndam sia lieh, la iathuh, ba ka la pynkyndit ia kiba bun na kitei kiba la shah pynsangeh kam noh kha ma kha.
“Don kiba iam, don kiba poi hospital, don ki bym treh bam ja shuh, ba la sngewsih eh bad don kiba iamai shi tnga ruh, ba la kylla shong khlem kam” ong u nongthoh khubor, uba la ia kynduh ia kiba bun na kitei kiba mad ia katei ka nusip ba sniewbok ha ka jingshah beh kam ei khamakha.
Na kitei ki 144ngut, la iathuh ba don na ki, kiba la pynkhreh ban ai da ka mukotduma pyrshah ia ka tnat pule puthi jong ka sorkar Jylla, namar katei ka jingleh bym hok jongka, ha kaba ka shu thung kam ia ki tang shi por bad ka sa beh noh, khlem da ailad ba kin jubab ialade.
La iathuh ruh ba la ai por, haduh ka 10tarik mynta u bnai, ia kitei ki nonghikai, kiba la shah beh kam, ba kin ai jubab, halor katei ka rai jong ka tnat pule puthi, ban beh kam ia ki bad ia kaei kaba ki don ban ujor sha ka sorkar, halor katei ka jingshah beh kam jongki, ong shuh shuh ka khubor.