Bun hajar ngut ki dkhot sengbhalang sha ka shong kyrain r500 ngut tang ki dkhot ka KSU Mawlai

Shillong, 12 Jymmang:
Da ki bun hajar ngut ki dkhot Sengbhalang na kylleng ka jylla kin poi lashai ka sngi hajan ka Additional Secretariat ban iakhih pyrshah sorkar da kaba shong kyrain ha katei ka jaka naduh ka por 10 baje mynstep haduh 4 baje janmiet.
Ha ka jingiakren bad ki nongialam seng bhalang ki la iathuh ba kam shym la don ka jing pynkhreh ban iaid paid bah ne ban ia mih ryntih ban leit sha katei ka jaka, hynrei la iakut beit ban ia poi lang hatei ka Parking Lot kabaa don hajan Secretariat. Hynrei ka don pat ka jingiamih ryntih ki Sengbhalang na la ki jong ki jong ki jaka kum ka Circle ba na Mawlai kin ia mih para nong Mawlai, Jaiaw para nong Jaiaw bad kumta ter ter.
Haba iakren bad u General Secretary ka KSU u samla Auguster Jyrwa u la ong ba ka jingiakhih kan iaid beit kumba la pynbna bad haduh mynta u la ong ba kam shym la don kano kano ka jingkhanglad na ki bor jong ka ain ban pynlong ia katei ka jingiakhih. U samla Auguster u la ong ba um nang ong katno ngut ki sengbhalang kin poi sha katei ka jaka pynlong iakhih, hynrei ha kaba ia dei bad ka KSU pat u la ong ba ka seng ka la phah jingtip sha baroh ki Unit kiba don ha ki thain nongkyndong ruh, hynrei kin don pat ki ban wan bad don ruh ki ban ym wan, u la ong. Haba iakren bad u President ka KSU na Mawlai Circle, ka Circle kaba ju mih bun tam ki dkhot haba don kano kano ka jingiakhih u President katei ka Circle u samla Biangbor Paliar u la ong ba na Mawlai kin don kumba 500 ngut eiei kata tang ki dkhot ka KSU ki ban leit ia shim bynta ha katei ka jingiakhih ba nyngkong ki Sengbhalang da kaba shong kyrain hajan ka Addittional Secretariat. La sngewthuh ba tang ki dkhot ka KSU ki ban poi sha katei ka jingiakhih kin tam ia ka hajar ngut, la antad ba haba ia khein bad kiwei pat ki Sengbhalang ba kynthup ia ka FKJGP, HNYF bad kiwei kan poi sha ka ar hajar tam bad katei ka jaka pynlong iakhih kan dap mam. Lah ban kdew ba katei ka dei ka jingiakhih ba nyngkong ba ki Sengbhalang ki la pynbna hadien ba ka sorkar kam shym la sngap ia ka jingdawa ki Sengbhalang kaba ki la buh por hapoh ka 48 kynta kaba la kut noh ha ka sngi saitjain, ki jingdawa ki long ban pyllait ia u President ka KSU u samla Daniel Khyriem uba la shah kem ha ka 7 tarik u jymmang bad ban weng noh ia baroh ki mukotduma pyrshah ia ki dkhot sengbhalang kiba la shah ujor ha ka por ba iakhih ILP.