Shillong:Naduh myn hynnin ka sngi ha nongbah Shillong ki nongdie doh masi ki la pynkiew dor biang ia ka doh masi na ka dor kaba la don lypa,kata ka doh kaba sop shyieng ka la kiew mynta sha ka T.450 shi kilo na ka T. 400 kaba mynshuwa, katba ka dohmet pat la pynkiew sha ka T. 600 na ka T.500 kaba mynshuwa.
Na ka liang jong u President ka Khasi Jaintia Butcher’s Association (KJBA)u Bah G Warlarpih, haba kylli halor ka jingpynkiew ia ka dor jong ka doh masi, u la ong ba ka rai ban pynkiew ia ka dohmasi ka dei na ka jingbymioh masi ban shohdoh.
U bah Warlangpih u la iathuh ba bun na ki dukan die dohmasi ha iewduh, mynta ki la hap ban khang khyrdep noh, namar ba ka jingbym ioh masi bad lada ioh rug ki masi ki la kiew dor shaba palat pud.
U Bah B Kharbuli u la ong ba ka daw jong ka jingkiew dor jong ki masi ka dei na ka jing jur ka jingkhaii be-ain ia ki masi bad kumjuh, ka jingkhang ia ka iew die masi ha Khanapara ka la wanrah ia ka jingkulmar ia ki nongthied masi.
U iathuh ruh ba ka jingshohdoh ia ki masi ha ki por ba la leit kan ym duna ia ka 30tylli ne 40 tylli shisngi shisngi, hynrei mynta u ong ba ka jingshoh doh ia ki masi ka long tang kumba 5 ne 6 tylli shisngi.
Kawei ka jingeh ba hap ban pynkiew dor ka dei namar ka jingkhang noh ia ka iew die masi ha Khanapara Ri Bhoi District bad ba ia ki masi la hap ban shaniah na shabar ka jylla, namar ba ym lah ban ioh ia ki masi na la ka jylla. U la ong ruh “Da ngi thied masi ruh ngi hap ban pynkiew ia ka dor ba ngin shu shong ha iing te ngin bam daei kein” .
U la ong ruh ba bun ki dukan khamtam ha iewduh, kiba la khang noh ha kaba, kiba plie ki don sa tang kumba 5 ne 6 tylli na ki 30 tylli tam ki dukan die doh ha iewduh.
Te da lah plie ka iew die masi ha khanapara hato kin ia pynhiar dor ne em kine ki lalot kyreit.