Bun, ba die kyiad ha Iewduh

Shillong, 18 Nailar:
Ki rai jong ka jingialang paidbah jong ka KHADC ban pyn long ia ka Iewduh kaba khuid kam pat shym la lah ban treikam.
Ha ka jingshisha u CEM ka KHADC u Bah Ardent Basaiawmoit ha ka jingialang paidbah ba ladep u la pynbna ia ka rai ba yn ym shah shuh ban die kyiad ha Iewduh hynrei haduh mynta dang bun kiba dang kyiad.
Katkum ka jingtip ba la ioh da u nongthoh ha kane ka sngi Nyng kong, la iathuh ba ki dukan kyiad ki dang die sahuh sahai hi haduh mynta kynthup ki Restaurant. Ym tang katta u CEM ruh u la pynbna ruh ia ka rai ba yn ym shah shuh ban sah miet iano iano ruh ruh ha Iewduh lait noh ia ki bor pahara hynrei kane ka rai jong ka KHADC ruh kam pat treikam satia.
“Uhh…phi…ki dukan kyiad ki dang iadie ki dang iadie hi”, la ong uwei u bah ba ju don ha Iewduh haba kylli u Rupang, ka long kumno ka Iewduh hadien ba la pynlong ialang u Bah Ardent.
“Lada phin wan ban peit khamtam ha ka por janmiet lei, phin iohi, ki nongsah miet ruh kim pat mih, ki dang sah hi ki dang don hi”, la bynrap une u rangbah.
Haba iakren bad ki katto katne ki nongiew, ki la ong ba ki rai ba la buh da ka KHADC ka donkam ban leh da ki kam bad kan bha lada ki briew jong ka Council ne u Syiem Mylliem kin wan khynra kumba khynra trading license ia kiba die kyiad bad kiba sah miet. “Lada ym wan khynra, ki rai kim urlong da lei lei ruh”, ki la ong.
Na ka liang u CEM ha kane ka jingialang ba la dep u la ong ba ia ki rai yn pyntreikam noh naduh katei ka sngi hadien ba la wai ka jingialang.
Hynrei haduh mynta ym pat don kawei na ki rai jong ka KHADC ba la treikam namar wat ka jingjaboh ha Iewduh ka dang jur khamtam ha basa sohsaw namar ba ki nongpynkhuid ba la buh da ka Hima Mylliem ki duna.
Ha ka jingshisha u Syiem ka Hima Mylliem u la dei ban buh kham bun ki nongpynkhuid khnang wan wanrah ia ka jingkhuid jingsuba ha katei ka Iew.
Ki nongshong ha basa jhur, ki la ong ba ka jinglong jingman kane ka iew kam pat kylla ka la nang bun pynban ki jingjaboh.