Buhteng iakren kam pud ka Meghalaya bad ka Assam

Shillong:U Myntri Rangbah ka jylla, u Conrad K Sangma, ha ka sngi Palei, ula pyntip ba la pynsangeh shwa ia ka jingiakren pynbeit pud jong ka bynta kaba ar hapdeng ka sorkar jylla jong ka Meghalaya bad sorkar jylla jong ka Assam, namar ka jing iaid ka kam phiah Constituency jong ka Election Commission of India (ECI) ha ki bun ki bynta ha jylla Assam.

Na ka liang jong u Sangma, u la iathuh, ba ha ka jingshisha ha kane ka taiew, ki la ia dep ban pynbeit bad u Myntri Rangbah jong ka jylla u Assam Himanta Biswa Sarma ban leit jurip, ia ka thain ba don ka jing ia kajia kum ka Khanduli ha West Jaintia Hills District, hynrei namar ba ka don ka jingphiah konstitwensi hapoh katei ka jylla, la hap ban pynkynriah noh shwa ia kane ka kam ba la pynbeit kham ha shwa, sha kawei pat ka tarik.

U Conrad u la iathuh ruh, ba na ka liang jong u Myntri Rangbah ka jylla Assam, u la kyrpad ia ka sorkar Meghalaya ban pynbeit noh ia ka tarik ba thymmai, ha kaba kine ki myntri rangbah kin leit hiar jurip ia ki jaka ha ki thain khappud, ha shuwa ba kin sdang noh ka jingiakren pynbeit pud jong ka bynta kaba ar.

U Myntri Rangbah jong ka jylla Meghalaya, u la ong ba ha shuwa ban kut une u bnai, kin sa leit jurip ia ka thain Khanduli, ha kaba u la ong pat ba ki Chairman bad ki Regional Committee, kin sa la leh ia ki jingdonkam haba iadei bad ka jingsdang noh ia ka jingiakren ban pynbeit pud na ka bynta kaba ar.