|
Shillong: U Myntri Rangbah ka jylla u Conrad Kongkal Sangma u la ong ba ka thong jong ka sorkar ka long ban shalan ïa ka dud shabar jylla ruh namar ba ngi kot ka bor bad lada ki nongrep ki don ka mon.
Ïa kane la ong u Myntri Rangbah ka jylla haba kren ha ka jingïalang plie paidbah ïa ka Directorate of Dairy Development and Meghalaya Milk Processing Centre, kaba don ha Mawiong, mynta ka sngi.
 “Balei ngin pynmih dud tang na ka bynta ka jingdonkam ki nongshong shnong ka jylla?” la kylli pharshi u Myntri Rangbah haba kren ha kane ka jingïalang plie ïa kane ka directorate ba thymmai, bad u la bynrap da kaba ong, “Nga tharai ngi lah ban pynmih ïa ka dud ban sam sha kiwei ki jylla kum sha Assam, khamtam eh sha bar ri kum sha Bangladesh.”
U Myntri Rangbah Conrad Sangma u la ong ba lyngba jong kane ka Directorate lah ban kynjoh sha kata ka thong namar ba ngi don ka mon, ngi don ka lad bad ki nongrep ki don ka mon banleh ïa kata.
“Ka jingthmu jong kane ka Directorate ka long ban ïaleh ban kynjoh ïa ka thong ban long ka tnad kaba pynmih bun eh ka dud ha kane ka thaiñ baroh kawei, khnang ba ha kawei ka sngi ka jylla Meghalaya kan shalan ïa ka dud shabar ri kum sha Bangladesh bad kiwei ki jylla kane ka thaiñ,” la ong u Myntri Conrad Sangma.
Ha kane ka jingialang la iadon ryngkat ruh u Symbud Myntri Rangbah ka jylla u Bah Prestone Tynsong kum u symbud kongsan bad u MLA ka Mawlai Constituency u Bah Process T Sawkmie. Kiwei de ki officer sorkar kiba la iadon lang ki kynthup ia u Additional Chief Secretary ka jylla, haka juh ka por uba long ruh u Agricultural Production Commissioner u KN Kumar, IAS, Secretary jong ka sorkar jylla uba khmih ia ka tnad Animal Husbandry & Veterinary u Dr. Manjunatha C, u Director jong ka Dairy Milk Development u Bah JA Warbah bad u Chairman jong ka Shillong Milk Union u Bah P Kharbteng.
|
Phi don ban ong eiei?