Buh sngi ia kren kam pud ka Assam, Meghalaya ba tuklar ka PMO

Shillong, 30 Lber:
Ka jingbuh sngi ban iakren pynbeit pud hapdeng u Myntri Rangbah ka Assam bad ka Meghalaya kam dei namar ba ki kwah hi hynrei, katkum ka khubor, ka dei namar ba ka ophis jong u Myntri Rangbahduh ka ri, (Prime Minister Office) jong u Narendra Modi, ka la bthah ia ki ban iashong ban iapynbeit ia ka jingiakajia pud. Katkum ba paw, ka jingtreikam ka ophis jong u Myntri Rangbahduh ka ri, ka dei kaba sted bha ban tuklar haba ioh pdiang kano kano ka jingthoh na ki paidbah ne ki riew shimet.
U Myntri Rangbah ka Assam u Sarbanda Sonowal bad u Myntri Rangbah ka Meghalaya u Dr Mukul Sangma kin iakynduh ha ka 3 tarik Iaiong ha Guwahati ban iakren ia ka jingiakajia pud.
Ym pat lah ban tip ha kano ka dur ne ka mat ba kin iakren hynrei kum ioh jingtip, ka ophis u PMO kala bthah ia kine ki ar tylli ki jylla ban iapynbeit da ka lynti kaba sngew tynnad baroh ar liang.
Kumba ka paw naduh mynshwa, ka jingiakren pynbeit pud hapdeng kine ki ar tylli ki jylla, kam ju poi shaei shaei ruh wat ha ka jingshisha, baroh kine ki jylla la synshar kajuh ka party Congress.
Hynrei ha kane ka kynti, ka jingsynshar ka iapher ha kaba ha Assam, la synshar da ka BJP katba ha Meghalaya dang synshar ka Congress.