Buh pulit kyrpang ka sorkar ha Delhi ban peit ia ki briew dong Mihngi

Shillong, 30 Jymmang:
Namar ka jingjur ka jingjia ba shah leh bein bad ka jingshah pyndik ki briew na kane ka thain shatei lammihngi ka India kiba sah ha nongbah Delhi, ka sorkar ka la thung ia u chief coordinator uba bat ha ka kyrdan IG bad 11 ngut ki Coordinator na ki district additional CsP/DCsP bad 40 ngut ki nongmihkhmat na ki pulit na ki samla pule bad ki nongtrei jong ka North East.
Ia kane ka jingpynbna la pynmih ha kane ka sngi Thohdieng da ka sorkar pdeng ba la ialam da u myntri rangbah ka ri u Narendra Modi.
Ki pulit kin pynlong ia ka jingialap bad ka jingiatreilang jong baroh ki kyrdan bad kin pynlong ia ki jingialang khah khah bad ki nongmihkhmat na ki samla pule bad ki nongtrei kiba dei na kane ka thain. La buh ruh ia u helpline number 1093 na ka bynta ki briew jong kane ka thain uba la treikam naduh ka 14 tarik Rymphang bad ka Special cell ha Nanak Pura police station la buh ia kane na ka bynta ban peit tang ia ki briew kiba dei na kane ka thain NE.
U Joint Commissioner of Police (Training) la thung kum u Chief Nodal Officer ban peit ia ki jingeh jong ki briew na kane ka thain. La buh ruh ia ka pulit ophisar kaba nang phareng bha ban peit ia ki jingeh jong ki briew kane ka thain ha katei ka nongbah.
Ia ka website la dep pyntreikam kaba kyrteng ka dpne.com na ka bynta ban pdiang ia ki jingai jingmut halor ki jingeh jong ki briew na kane ka thain kiba sah ha ka nongbah Delhi.