|
Shillong:Hadien ka jing iakhun kaba khlem shongthait bad khlem da kynran dien, da kiba haing ha sem lem bad ki nong ialam jong ka FKJGP, u bah Michel Warjri Secretary ka Hima Nongspung u la ioh jamin noh hadien hynniew sngi, hadien ba ka Guwahti High Court ka la rai ban ai jamin noh ia u bad pyllait napoh ka central jail jong ki pulit Assam.
 Haba ia kren bad ki nong pathai khubor hynnin ka miet, U bah Michael u la ong “Haduh mynta ka Sorkar ka la buh ia ki 8 ngut ki pulit ban pahara ia ka ing jong nga. Lada kine ki lai shnong ki wan ban hiar thma biang, kito ki pulit kin leh aiu. Haei lut ki pulit Meghalaya ki don lut, da kumno kumno dei ban buh 20 ngut ki pulit ban pahara, namar ki briew kiba wan ba wan thombor ia nga ki dei lut na Meghalaya ba ki kwah ban rah ia ka jaka sha Assam”.
Na ka liang u President ka FKJGP u bah Welbert Ranii u la ong “Kane ka jingjia ka pynduh ia ka jing shaniah ha ka Sorkar jong ngi ba ngi ioh i ia ka jingtlot bad ka jing bymnud jong ka sorkar ban kren ne ban leh eiei ban iada ia ki briew lade. Ki don na ki minister ki ba la leit ban peit, hynrei tang ban shu leit peit kam biang ngi dei ban nud ruh ban leh eiei ne kren ba kane ka dei ka jaka jong ngi, hynrei haduh mynta ruh kam don ka jingpynrem pyrshah ia ka Sorkar Assam na ka liang ka Sorkar Meghalaya”.
U bah Welberth Rani u la ong “Ka Sorkar Meghalaya ka sngap ia ki jing leh ka Assam, ka daw ka long ba ka sorkar ka lait ei ban wanrah ia ki kam pynroi kumta ka ailad ia ka Assam ban wanrah ia ka kam pynroi ha ki jaka khappud bad na ka liang ki nongshong shnong ruh kin kwah ban leit bad ka Assam hi haba na ka liang ka sorkar Meghalaya ka khlem ai kam pynroi eiei ia ki bad kane ka wanrah ia ka jingma kaba khraw ia ka ri u hynniewtrep”. La ong shuh shuh ba na ka liang jong ka seng ka pynrem jur ia ki briew kiba la shim kabu bad thombor ia u bah Michael Warjri bad ban set along ruh da ki pulit Assam, kaba long ka ba pyrshah wat ia ka rukom pyrkhat jong ka ain.
|
Phi don ban ong eiei?