Buh mawnongrim u Director ka MUDA, ban tei jaka ieng kali ha Nongpoh

Nongpoh:U Bah E. Kharmalki, Director ka Meghalaya Urban Development Agency, mynta ka sngi u la leit ban plie ia u Mawnongrim na bynta ban tei ia ka kynja surok bad ka jaka ieng kali kaba biang hakhmat ka phyllaw jong ka Nongpoh Town Shopping Complex, kaba don ha sor Nongpoh.

Ha katei ka sngi, kaba la buh bad plie ia utei u Mawnongrim, la sakhi ruh da ka jingdon u Bah B.B. Makdoh, Chairman ka Synjuk Ki Rangbah Shnong Ri Bhoi District, nangta u Bah S. Langstieh, District Urban Officer, u Bah S. Lyngdoh, Chairman ka Nongpoh Town Committee, u Bah Rayonald Kharkamni, Secretary ka Nongpoh Town Committee, u Bah W. Wanphrang, Sirdar ka Elaka Nongpoh Sirdarship lem bad shibun kiwei ki nongialam shnong ka thain Nongpoh.

Ban tei ia katei ka surok lem bad ka jaka ieng kali kaba biang, la buh ia ka jingpynmang tyngka kaba haduh T. 10 lak, ia kaba la pynmang tyngka, lyngba ka MUDA jong ka sorkar Meghalaya.