Buh maw nongrim u myntri pynroi sor, ia ka surok Mawnianglah Mihngi

Shillong: U Myntri ba dei peit ia ka tnad Urban Affairs, u bah Hamletson Dohling, u ba dei ruh u MLA ka Mylliem Constituency, myn hynnin ka sngi u la leit ban plie ia u maw-nongrim na ka bynta ka Mawnianglah Mihngi, Mawnianglah Sepngi bad Kynthawlang ha Upper Shillong kaba dei lyngba ka Rural Infrastructure Development Fund (RIDF) – XXIV.
Nalor katei ka shnong, ki don sa lai tylli ki shnong kiba la pynrung ban ioh skhim shna surok lyngba ka RIDF ha ka mang jinglut kaba long T. 1,56,29000 /- (shi klur sanphew hynriew lak arphew khyndai hajar) bad shen yn pyntrei noh ia ki. Nalor ka shnong Mawnianglah, ki don sa ar tylli ki shnong kiba shen kin ïoh surok rong lyngba kane ka skhim RIDF kata ka shnong Baniun bad ka Sawmer shiteng.
Haba ai jingkren h katei ka jingialang plie maw nongrim na ka liang jong u bah Hamlet u la pynpaw ba bun ki surok ha ka Constituency khamtam ha ki shnong ba kham kyndong ki bun kiba la duh lut bad kumta ka donkam ban pynbha.
“Ha ki shi snem tam kum u nongmihkhmat ka Constituency nga la iai pyrshang ban pynbiang bad weng ia ki jingeh kiba u paidbah u ia kynduh bad ki paidbah nongshong ki ud halor ka jingsoh-sat ha ka leit ka wan” ong u bah Hamlet da kaba u la bynrap shuh shuh ba bun ki kam kiba hap ban pyndep bad ki kam pynroi kim dei ki kam ba tang shu ong ba lah ban long noh hynrei ki donkam ia ka por hynrei kum u nongmihkhmat un iai pyrshang ban kyntiew ia ka thaiñ bad ka Constituency hi baroh kawei.
Katba na ka liang jong u bah ES Lyngdoh Executive Engineer PWD (Roads), Shillong South Division, haba kren ha kane ka jingialang u la ong ba ka jing-pyntrei ia ki surok lyngba kane ka skhim ka dei halor ki kyndon kiba pyrkhing bha. U la iathuh ba la dep ban khot tender ban pyntrei noh ia kine ki surok bad shen kan long ka jingmyntoi ia ki paidbah nongshong shnong ha ka liang ka leit ka wan, ka kit ka bah bad kiwei kiwei pat. U la iathuh ba la mang tyngka na ka bynta kine ki surok ha u bnai Naiwieng jong u snem ba la dep.
Da kaba ai khublei ia ki ophisar ka tnad PWD (Roads), ula ong ba ka jingtrei shitom na ki ophisar ka tnad ka la pynlong ia kane ka surok ban ioh pdiang ia ka skhim bad kumba la ong da ki ophisar ba ki kontraktor kiba don lang ha kane ka jingialang plie maw-nongrim ba shen kin sdang noh ia ka jingtrei.
U la ong ba kum u nongmihkhmat u don ka thong ban kyntiew ha ka roi ka par, ka pule puthi, ka koit ka khiah, ka um bam um duh bad kiwei kiwei ki kam ban kyntiew ia ki paidbah. “Hynrei kiei kiei baroh kin urlong da ka jingiatrei lang”, la ong u bah Hamlet. U la kyntu ia ki kontraktor ban trei bha ia ka kam namar kumba la ong da ki ophisar ba ki kyndon ban pyntrei ia kane ka skhim ki long kiba pyrkhing bha mynta.