Buh maw nongrim u MLA, ia ka  Residential School ha  Sohparu  

Nongstoiñ: U Bah Macmillan Byrat, MLA ka Nongstoiñ u la buh maw maw nongrim na ka bynta ban tei ia ka Eklavya Model Residential School hapoh ka Shnong Sohparu kaba hap hapoh ka West Khasi Hills District.

Ka kong R. Khongwang, DSEO Nongstoiñ ka la pynshai ba katei ka EMRS ka dei ka skhim na ka sorkar pdeng, ba la peit la khmih da ka Ministry Tribal Affair kaba angnud ban pynioh ia ka jingnang jingstad kaba paka kyrpang na ka bynta ki riew lum (ST) kiba shong basah ha Ri India bad ka Ministry ka thmu ruh ban tei ia kiba kum kitei ki jait skul habaroh ki 36 tylli ki Block ka Meghalaya kiba ka jingbun briew, ka dei ban kot sha ka Arphew hajar ngut ki nongshong shnong.

Na ka liang jong u MLA ka Nongstoiñ haba ai jingkren kum u kongsan ha katei ka jingialang plie maw nongrim u la ai khublei ia ia ka kong B. Kharbani, kaba dei ka trai jaka kaba la ai sngewsbha 13 acre ia jaka  ban ioh tei ia katei ka skul.

“Ha kane ka juk kaba mynta, ka jingnang jingstad ka long ka atiar kaba khlain ban rat dyngkhong ia ka jingduk ka jingbiej bad ka jingsahdien kiba long ki kynjri bad ki saiteh sai khum ia ka ri bad ka jaitbynriew” ong u bah Macmillan Byrsat.

Shuh shuh u la ong ruh ba ka jingwan jong katei ka skul, kan ai jingnang jingstad ia ki khynnah ka thaiñ ka ban ia ryngkat bad ki skul ka ri thor bad kumjuh katei ka skul kan iarap ruh ia ki kmie ki kpa na ka jinglut ksan namar kin nym hap phah shuh ia ki khun ban pule shabar, kumta u MLA u la kyrpad ia ki paitbah ba kin iasnoh kti lang bad u nongmih khmat khnang bay n lah ban wanrah ia shibun ki kam pynroi ka ban long ka jingmyntoi ia ki shnong ki thaw bad ia ka District baroh kawei.

Ha katei ka sngi plie ia u tei u maw nongrim nalor u MLA la iadon lang ruh U Bah T Lyngwa, Deputy Commissioner ka West Khasi hills, ki ophisar na ka tnad pule puthi (Education), PWD R&B, PHE bad u Bah Bransly Rynshiang, Sordar ka shong Sangriang u Secretary Shnong, bad ki sordar shnong na ki shnong ba markhap bad ki nongshong shnong ka thaiñ.