Buh maw nongrim, U MDC ia ka Ebenezer English School ha Langlew

Nongstoiñ, 28 Iaiong:
U Chairman jong ka Khasi Hills Autonomous District Council (KHADC), u bah L.G Nongsiej, u ba dei ruh u MDC jong ka Nongstoiñ Konstitwensi mynta ka sngi u la ioh ban leit plie ia u maw nongrim jong ka skul Ebenezer English School kaba don ha ka shnong Langlew West Khasi Hills District.
Haba pynsngew ia ka history jong ka Jingiaid lynti jong katei ka skul, la iathuh ba ia katei ka skul la seng naduh u snem 2015 da ki 9 ngut ki shipara ha ka khyndew kaba la ai bynta da ki kmie ki kpa jong ki, bad kat haduh mynta ki khynnah kiba wan ban pule ha katei ka skul ki don haduh 150 ngut kaba khynthup ia ki shynrang bad kynthei bad ka don naduh ka class nursery haduh class III hynrei ki Class kin dang iai kha man la u snem.
U bah L.G. Nongsiej haba ai jingkren kum u kongsan ha katei ka sngi u la ai ka jingiaroh ia ki nongseng jong katei ka skul, namar da ka jingshlur ki la mih paitbah ban shakri ia la ka shnong ban seng ia kum katei ka skul phareng, bad u la ong ruh ba ban seng ia ka skul phareng ha ka shnong kaba dang long nongkyndong kam long kaba suk hynrei wat hapdeng ki jingialeh kiba bun jait kila lah ban pynurlong ia kaei kaba kila thmu.
“Ka jingdon jong kane ka skul nga tip ba kan long ka jingkyrkhu shibun ia ki nongshong shnong namar kim donkam shuh ban dang hap leit shaduh sha sor Nongstoiñ ban phah skul phareng ia la ki khun bad ka jinglut jingsep ruh kan iarap shibun na ka jinglut ksan, lada phah skul sha sor Nongstoiñ ym tang ba ki kmie ki kpa ki hap ban pynlut tang na ka bynta ka bai skul hynrei ki hap ban wai ia ki iing ha ka dor kaba heh, namar kata haba iadei bad kane ka skul nga long ba la kloi ban iarap katba ba lah ei da I bor jong nga bad nga long ba la kloi ruh ban iashim bynta lang ha kano kano ka jingdonkam jong phi na ka bynta ka ne ka skul” ong biang u bah Nongsiej.
Ia katei ka prokram plie maw nongrim skul la pyniaid ia ka jingialang da u bah Rollingwell ?awphñiaw uba long ruh u Chaiman jong ka Managing Commmitte ha katei ka skul, ha ryngkat lang ruh u bah H.F.Marngar (ex MDC ka Pariong), bah GNS Myrthong (Nonghikai ka Skul Khlur Barit Umlieh), Miss Pynsuklin Kharbani (Asst Teacher Ebanezer English School Langlew) u bah M.Thabah u wei na ki riew rangbah jong ka thain kiba la ai jingkren ruh ha katei ka jingialang.
Hadien ka jingialang plie Mawnongrim u bah LG, u la ioh ruh ban pynhap pyrda noh shi syndon ia ka lympung ialehkai sport jong ka skul kaba la tip kum ka Inter House Sport.