Buh ka Thadmuthlong Pyllun da ki kyndon ia kiba wan ialap elekshon hapoh shnong

Jowai: Ka Thadmuthlong Pyllun ban tehlakam ia ka shongsuk shongsaiñ hapoh shnong poh thaw khamtam ha kine ki por election ka la buh da ki kyndon ia ki kyrtong sha ka shuki MDC ba ki dei ban bud ryntih katkum ka rai jong ka Synjuk Shnong kaba la long ha ka 4 tarik Rymphang, ba ia ki nongmihkhmat bad ki nongkyrshan la shah ban wan tang hapoh 5 tylli ki kali ha ka por wan pynlong jingialang hapoh ka shnong.

Ka Synjuk Shnong ka la rai ruh ba ki nongmihkhmat ki dei ban pynlong ia ka jingialap elekshon tang hapdeng ka 10 baje mynstep haduh ka por 5 baje janmiet, Nangta, yn ym shah ruh ia kiwei pat ki briew kiba shabar shnong ban wan ialap elekshon hapoh jong ka shnong.

Ka Synjuk ka la buh ia ka kyndon ba ka rukom pynlong jingialang jong ki nongmihkhmat ruh ka dei ban long tang shisien ha kawei ka jaka, kum ha Thadmuthlong  A, Thadmuthlong B, Thadmuthlong C, Phramer  bad  Muthlong Rim.