AIS SUJA
Buh ia ki kti ha kiba pang, te kita kiba pang kin iohkhiah. Markos 16:18. Kane ka long ka hukum u Jisu Ia ki. 11 ngut kiba leit ialap ka Gospel. Hadien ba u la ong to leit sha ka pyrthei ialap ia ka Gospel ha ki bynriew baroh.
Haba u Jisu u phah kumne, u la ai ruh ka bor ha ki ban leh kambah (miracles) tang da kaba buh ki kti ha kiba pang. U ong ruh ha ka kyrteng jong nga kin ia beh noh ia ki ksuid.
Don kiba mutdur ba kane ka hukum u Trai Jisu kan long tang ia kito ki khadwei ngut bad tang ha kito ki por. Hynrei EM kam dei kumta, namar une u juh u Jisu uba la ai bor ia ki khadwei ngut, u dang ai bor ruh hangi mynta namar u long u juh hynnin, mynta bad shaduh ki bymjukut. Uwei pa u wei uba ngeit udei ban ngeit ia kane, bad kito kiba pang ki dei ban ngeit ia kata, namar kadei ka hukum kaba u Trai Jisu u la phah, ki bymngeit te kila rem lypa, ong u ka ktien u Blei. Lada kim ngeit ym don ba leh ban pynngeit ia ki, ka sah ka mon jong ki hi.
Kane ka pateng bynriew ka donkam iaka jingialap ia ka ktien U Blei ryngkat ki kambah (miracles) namar ki long ki sngi kiba eh shitom ka dohnud u briew ruh ka eh, kumta u Jisu ha ba u phah, u la ai ka Bor (power) bad ki kambah (miracles) kin jia, ba kita ki bym ngeit kin ioh ngeit, ba kita kibym iohi kin iohi ia ka Bor ka kyrteng u Jisu Khrist, ka kyrteng halor ki kyrteng baroh, “BA HA KATA KA KYRTENG U JISU KI KHOHSIEW BAROH KIN DEM KHRUP, kiba ha ki Bneng, kiba ha ka khyndew bad kiba hapoh khyndew kein, u thylliej baroh un phla shynna BA U JISU KHRIST U LONG U TRAI, Jesus Christ is Lord. Philipi 2:9-11.
Kano kano ka jingialap, kano kano ka jingduwai kaba ha ka kyrteng u Jisu, ki khohsiew ki hap ban dem khrup, ki jingpang, ki jingeh ki bor ksuid bor soitan, kino kino kim lah shan haka kyrteng u Jisu uba na Nazareth. Ki hap ban dem khrup ki hap ban mane ki hap ban surrender (aiti) ha ka kyrteng kaba don bor U Jisu Khrist, kiba don ha bneng ki angel kiba ha ka pyrthei kiba dei ki briew bad ki ksuid, kiba hapoh ka khyndew ki suid iap, ki hap ban kohnguh kein.
Kadei ha kine ki sngi ba u ta uba la khot ialade u Khristan ne uba ngeit u dei ban ngeit shisha. Ymtang ban hun ha ki niam ki rukom, ymtang ban hun ba la don hapoh ka balang, hynrei dei bandon ka jingngeit kaba khraw haka kyrteng u Jisu. U Jisu u kren shai u ong – “Shisha shisha nga ong haphi, uta uba ngeit ha nga ba kita ki jingleh kiba nga leh; uta ruh un leh”. Ioanis 14:12.
U Jisu u la ai ka bor ym hano hano tang ha kiba khyndiat hynrei u ai lang baroh ha kiba ngeit. Ia kaei kaba u Jisu u leh, kita kiba ngeit ruh kin leh, ong ka ktien u Blei hynrei ia kane ka Bor, uta uba ngeit u don kam shwa ban iit ialade ban duwai ban pan ia ka bor ha ka kyrteng u Jisu Khrist. Ioanis 14:13-14.
Kumta ym da ka jingsarong, ym da ka jingsngewkhraw, hynrei ha ka them ka jingsngewrit ban duwai ban pan ka bor na U Jisu namar u hi u la ong – “Lada phin pan ia kaei, kaei ruh na nga ha ka kyrteng jongnga – IA KATA NGAN LEH KEIN”. Ioanis 14:14. Ynda kumta un ai bor ha kito kiba ngeit, ba kita ki ba pang kin ioh khiah bad ban beh ruh ia ki ksuid haka kyrteng u Jisu uba na Nazareth.
Ka pyrthei ka donkam mynta ia ki kambah ki jingpynkhiah bad ki kambah ban pynkhiah ia kiba pang da kaba buh ki kti haki bad da kaba pynsleh da ka um phniang ha ka kyrteng u Trai Jisu. Jakob 5:14-15.
U Jisu lyngba u Mynsiem Bakhuid (Holy Spirit) u dang trei haduh mynta tang lada ki briew kin ngeit bad donkam tang ka jingngeit hi. (Only believe).
Ka pyrthei ka ap khmih ia ki kambah (The world is looking for God‘s miracles).
Amen
Sngewbha ban duwai ia nga Wimlis Dkhar ba u Blei un Pynkhiah ia nga na ka bor jong ki ksuid ki jingdum ki bymman kaba wan ban pynjot ia nga.KhuBlei Shibun.U Blei un kyrkhu ia fi mo.