Buh dor ka sorkar jylla, ia ka bai sumar covid ha ki hospital praibed

Shillong: U Bah P Tynsong, myntri ka tnad ka koit ka khiah, u ba long ruh u Symbud myntri rangbah ka sorkar jylla, u la iathuh ba ha ka jingialang kaba la long mynta ka sngi la shim ia ka rai ban buh tymmai ia ka bai sumar ia ki nongpang Covid ha ki Hospital jong ki riew shimet ha baroh kawei ka jylla.

Haba ia kren bad ki lad pathai khubor u myntri ka tnad ka koit ka khiah u la iathuh ba kane ka dor thymmai kaba la buh da ka sorkar jylla kan trei kam naduh ka 15 tarik mynta u bnai.

U myntri,u la ong ba hadien ba ka don ka jingud jong ki ba bun ha ka ba ia dei bad ka jingsumar ia ki nongpang Covid bad hadien ba la shem ba ha ki ba bun ki hospital jong ka riew shimet, ka bai sumar bad ka MHIS kaba ka sorkar ka la ai, kam lah ban pyndap wat tang shiteng ruh ia ka bai sumar ha kine ki hospital bad kumta, u myntri, ula ong “Ka jingsiew ia ka bai sumar ia ki ba pang ia ka jingpang Covid ka ju long ba ka MHIS ka siew tang 60% bad kaba tam 40% hap siew hi ki paidbah na kata ka daw na ka liang ka sorkar ka la rai ban pynheh ia ka jingsiew ia ka bai sumar lyngba ka MHIS ha ka rukom ban kham pynsuk ia ki briew ki ba ngat ha kane ka jingpang”.

U bah Prestone u la iathuh ba kane ka bai sumar kaba thymmai ka ba ka sorkar ka la pynbeit ban sumar ia ki nongpang Covid ha ka jylla kan long, na bynta ki briew ki ba thiah ha ki general ward bad ki bym donkam ia ka oxygen ka bai sumar kam dei ban palat ia ka T.7000 shisngi, kito kiba thiah ha ka general Ward bad kiba donkam ia ka oxygen ka bai sumar kam dei ban palat ia ka T11,500 shisngi.

Ha kaba ia dei bad ki ba thiah ha ICU hynrei kim don kam ventilator ka bai sumar kam dei ban palat ia ka T 14000 shisngi, kito ki ba thiah ha ICU bad ki ym donkam ia ka intensive Ventilator ka bai sumar kam dei ban palat ia ka T.18.000 shi sngi bad kito ki thaih ha ICU bad ki ba donkam ia ka Ventilator kim dei ban palat ia ka T. 20,000 shisngi.

U bah Prestone u la ong ba kane ka rai jong ka sorkar ban siew ia ki jinglut jingsep ki briew kiba ngat ha ka jingpang Covid lyngba ka MHIS ka long ban iarap ia ki briew, ha kaba kin ym don kam shuh ban siew ia ka bai sumar na ka bynta ka jingpang Covid bad u la iathuh ba na ka liang ka sorkar jylla kan ai jingiarap ia ki hospital ki riew shimet bad ki hospital ba la pyniaid da ki riewniam ban pynbiang ia ki ICU bad ia ki oxygen plant bad kane ka long namar ka jingkiew sted jong kane ka jingpang ha ka jylla.