Buh dor dewbilat ha Meghalaya, na Assam, ong ki kontraktor

Shillong, 24 Iaiong:
Ki kontraktor ka Meghalaya hapoh ka lama ka All Meghalaya Contractors & Suppliers Association (AMC&SA) ha kane ka sngi Balang ki la iakynduh ia u Chief Secretary Bah PBO Warjri halor ka jingbuh ia ka dewbilat ba shna na Meg halaya na Assam.
U general secretary ka AMC&SA Bah BL Nongbri u la iathuh hadien ba la iakynduh ia u CS ba ki nongialam ka seng ki la batai ia ka dor jong ki dewbilat kiba pynmih na kane ka jylla hynrei la pynshong katkum ka dor iew na Assam kaba long ka bym iahap satia.
U la ong ba ha ka jingshisha ka dor jong ka dewbilat, ka dei ban kham tad ban ia ka dor ha Assam ha kane ka jylla Meghalaya namar ba ki kompeni ki la ioh shibun ki jingiarap na ka sorkar jylla.
“Ngi la tip ia ka jingdon jong ki karkhana shna dewbilat ha kane ka jylla Meghalaya ha kaba ki la pynjot ia ka mariang nalor ba ki la ioh jingiarap na ka sorkar jylla hynrei ngim lah sngewthuh shuh ia ka dor jong ka dewbilat pat la buh dor na Assam”, la ong u general secretary AMC&SA.
U la ong ba ka sorkar ka dei ban shim ia ki lad ki lynti ban pynthikna ba ka dor jong ka dewbilat ha kane ka jylla kan kham rit ban ia ka dor sha kiwei ki jaka.
Ka dor jong ka dewbilat ha kine ki sngi ka la kiew sha ka T.350 shi byrni rit. Ngi sngew ba ka dei ban long kham rit ban ia ka Assam bad la kumno kumno kan long T. 250 shi byrni rit”, ha kane ka jylla.
U Bah Nongbri u la iathuh ba u Chief Secretary u la pynthikna ban peit ia kane ka kam.