Buddien ka NCW, ia ka jingpynkupbor kynthei ha jylla

Shillong, 9 Rymphang:
Ka National Commission for Women (NCW) ka pynlong ia ka jingbuddien ne surbe halor ka jingiadei jong ki kynthei ha ka imlang sahlang, ka ioh ka kot bad ka sain pyrthei ha kane ka jylla.
Ka Meghalaya State Commission for Women (MSCW) kan leh ia ka jingjurip ne surbe da ka jingkyrshan jong ka Social Work department ka skulbah Martin Luther Christian University (MLCU).
Kane ka jingleh surbe kan kdup haduh kumba 1,100 ngut ki kynthei kiba 18 snem shaneng ha baroh ki 11 tylli ki district ha kane ka jylla. Ki jaka ban leh ia kane ka surbe kin long ha sor, bad ruh ha jaka nongkyndong.
Ar ngut ki nongleh ia ka surbe yn buh ha man kawei ka district bad kane ka kam kan sdang ha kane ka taiew hi bad yn pyndep hapoh 60 sngi kaba kut ar bnai.
“Ngi la shim ia kane ban leh surbe ha baroh ki jylla ka ri”, la ong ka dkhot ka NCW ka Shamina Safiq hynne ka sngi sha ki nongthoh khubor ha ka nongbah.
Ka la iathuh ba kane ka surbe la leh hadien ba la sangeh mynta la 12 snem.
Kane ka dkhot jong ka NCW ka la iathuh ba ka kaiphod jong kane ka surbe yn sa pynlait paidbah hapoh hynriew bnai.