Buddien ka FKJGP na U SP, halor ka jingtei ïa ka iing ki pulit ha Langpih

Nongstoiñ:Ka Seng Federation of Khasi Jaiñtia and Garo People (FKJGP) Langpih Area Unit, ha ryngkat ka jingleit synranlang ki dkhot ka FKJGP, West Khasi hills, myn hynnin ka sngi ka 9 tarik u Naiwieng, ki la leit ban ïakynduh ïa u SP ka West Khasi hills, u bah H.G Lyngdoh ban buddien halor ka jingthmu ban tei ïa ka building jong ka Police Outpost ha Langpih.

Kaba la pynlong ïa ki dkhot jong ka Seng ban leit buddien ïa katei ka kam kadei hadien ba ki dkhot jong ka Seng kila sakhi ba kam shym pat la don satia kano kano ka dak jong ka jingpyntrei ïa ka building na ka bynta ka tnad pulit ha Langpih.
Kum ban shu pynkynmaw ba ha ki snem ba la lah ka Khasi Hills Autonomous District Council (KHADC) ka la noh jingiarap 30 lak tyngka na ka bynta ban shna ïa ka building jong ka tnad pulit ha Langpih bad ïa ka jaka ban tei ïa katei ka iing, la pynthied da u MDC ka Rambrai Jyrngam Constituency u bah Bajop Pyngrope bad ai sngewbha noh sha ka Hima Nongmynsaw Syiemship.

U bah Serbilin Lyngdoh President FKJGP Langpih Area Unit haba iakren sha ki lad pathai khubor hadien ba la dep ïakynduh ïa u SP, u la ong ba na ka liang jong u SP u la pyntip sha ka Seng ba ka kam ka dang iaid bad shen yn sa lah ban sdang noh ïa ka jingpyntrei ïa katei ka building ka tnad pulit ha Langpih.