Buddien ia ki jingdkoh ka rukom treikam ka Patharkhmah CSD, kyntu u heh ka RBYF ia ki nongialam ka Western Zone 

Nongpoh, 24 Naiwieng: U Bah Bipul Thangkhiew, President ba rangbah ka Ri Bhoi Youth Federation (RBYF) Sengkmie, u la kyntu ia ki nongkitkam ba thymmai ka RBYF Western Zone, ba ki dei ban shimkhia ha ka ban buddien ia ka jingdkoh ka rukom treikam jong ka Patharkhmah Civil Sub-Division bad kata ka dei hadien ba la mih shibun ki jingkynthoh na ki paidbah halor ka jingdkoh ka rukom treikam ha Patharkhmah Civil Sub-Division.
Kitei ki jingkren jong u Bah Bipul Thangkhiew, ban btah ia ki nongialam ka RBYF Ri Bhoi Sepngi ba ki dei ban buddien bha ia ka rukom treikam ka Patharkhmah Civil Sub-Division, ka dei ha ka sngi ba ki la pynskhem ia ki nongkitkam ba thymmai jong ka RBYF Ri Bhoi Sepngi bad kaba la long hynnin ka sngi Saitjain ha Iing Dorbar Patharkhmah.
Nalor kaba u la kyntu ban buddien ia ka jingdkoh ka rukom treikam ha Patharkhmah Civil Sub-Division, Bah Bipul Thangkhiew, u la kyntu ruh ia kitei ki nongialam ba thymmai ka RBYF Ri Bhoi Sepngi, ba ki dei ban long kiba iatreilang bad ki nongialam shnong ha ki shnong bapher bapher kiba don ha katei ka thain, na bynta ban wanrah ia ka bha ka miat, na bynta ka shongsuk shongsain bad ruh na bynta ka roi ka par ha ki shnong kiba don ha katei ka thain.
Haba pynskhem ia ki nongkitkam ba thymmai ka RBYF Western Zone, nalor u President ba rangbah, la sakhi da ka jingdon u Bah RJ Thangkhiew, Political Secretary ka RBYF Sengkmie, u Bah Elvis Kharbani, u Bah Phrang Kylla, u Bah Liander Nongshli lem bad kiwei.
Ki nongkitkam ba thymmai ka RBYF Western Zone, ki kynthup ia u Bah Rishan Nongtri kum u President, u samla Tony Lyngdoh kum u General Secretary lem bad kiwei pat ki dkhot hapoh jong katei ka Zone.