Shillong,7 Nailar:
Tang khyndiat kyn ta, hadien ba ki pulit ha ka nongbah Shillong ki la ai jinghikai ia ki pulit ban ai ia ka jingiada kaba sted tam lada jia ka jingbthei bom, ka la mih noh ka jingjia bthei bom kaba shisha ha Ri-Lum Garo ha kaba 6 ngut ki pulit, kiba dang don ha ka jingleit lynti jong ki, ki la lait thaw da ka said na u bom ba la riam ia ki ha ka surok ha Nengkhra kaba don ha Williamnagar East Garo Hills, ha kaba utei u dei u bom uba la suba, ba la riam da ka kynhun kieng atiar ka GNLA.
Kane ka jingjia ka la jia ha ka por 8:30 baje mynstep mynta ka sngi. Ka tyllong khubor ka la iathuh ba ki pulit kiba la shong ha kawei ka kali trok iada kuli kaba don ia u nombar ML02-0756 bad kiba dang don hapdeng ka jingleit lynti jong ki, hynrei ynda ki la poi ha Nengkhra, kynsan kynsan u bom uba na ka jingjngai kaba 2-3 kilomitar u la bthei, ong u Superitendent of Police ka ka East Garo Hills u JFK Marak.
Ki pulit ki la lap shuh shuh sa ia uwei u bom IED u bym pat shym la bthei uba la buh pynap ha kynriang ka surok, u Marak u la iathuh ba ha ka jingshisha la pynap ar tylli ki bom, hynrei tang uwei u la bthei. U la ong ruh ba ha katei ka jingjia ym shym la don ba mynsaw.
U SP u la iathuh ba ha katei ka jingjia kaba la suba ba dei ki kam pyntriem jong ka GNLA. Ka kali ba kit ia ki pulit ka la julor. U la ong ruh ba ki pulit ki la ioh ban kurup ia uwei u waiar uba jrong kumba 30 mitar uba pyndonkam ban pynbthei bom na katei ka jaka.
Tang katto katne por hadien katei ka jingpyntriem da u bom ki pulit ki la pynlong ia ka jingkhynra kaba jur ha katei ka thain ban lap ia ki runar kiba la thmu ban shim ia ka jingim jong ki, hynrei haduh mynta, ym shym la ioh kem satia iano iano ruh.
Phi don ban ong eiei?