Bthei shi trok ki tiar siat maw ha Karnakata, iap 15ngut ki nong bylla

15 ngut ki briew ki la iap ei, lem bad ki nong bylla na Bihar, haba ka trok, kaba kit ia ki tiar pynbthei (gelatin), ka la bthei, hajan kawei ka par tih maw.

Katei ka jingjia, ka dei ha ka nongbah Shimoga, kaba don ha pdeng bah jong ka jylla Karnataka bad ka la jia hynnin, ha ka por 10.30 mynmiet. La iathuh ba katei ka trok, ka kit shibun ki tiar siat maw ha ka por jong katei ka jingjia.

Ka jingbthei, ka la jubor bha, ha kaba la ioh sngew jngai bha na katei ka jaka, kaba kynthup ia ka Chikmagalur bad ka Uttara Kannada districts bad kaba la pyntieng koh tympan, ia kito kiba ioh sngew bad la iathuh ba ka don ruh ka jing khynniuh jumai, namar katei ka jingbthei, kaba la ngam jylliew shapoh ramew jong katei ka jaka, ong ka khubor jong ka Natural Disasters Monitoring Centre.