Shillong: U Myntri Rangbah ka jylla U Conrad K Sangma, u la iathuh ba na ka liang jong u, u la dep ban phah ka jingbthah ban khot ia ka jingialang jong baroh ki seng sain pyrthei ban ia kren halor ka shong suk shongsain ha ka jylla.
Haba kren ha ki lad pathai khubor ha ophis trei kam jong u, u la iathuh ba ki la don bun ki seng sain pyrthei kiba la kren ia u halor kane ka bynta bad u la ai ka jingbthah ia ka Additional Chief Secretary ba dei peit ia ka tnad kam poh iing bad kum juh ia ka tnad political ban khot ia ka jingialang.
Na ka liang u myntri rangbah u la khot la wer ia baroh ban ia trei lang na ka bynta ban wanrah ia ka shong suk shongsain, kum ba ka long mynta ka jingshongsuk kala sdang ban wan bad ban pynneh ia ka ne don kam ia ka jingiatrei lang jong baroh ki paidbah,ka sorkar ka leh ia la ka kamram jong ka. Na ka liang jong u myntri rangbah u la ong ba u la khot ia ka jingialang ban ia kren halor ka jinglong jingman ka shong suk shong sain.
Ha ka ba iadei bad ka korphiw kin dang ia kren biang mynta ka jan mied, na ka liang jong ka sorkar kan peit ba ka jingpahara kan long ka ba biang ban pynneh ia ka shong suk.
Na ka liang jong ka sorkar ka sngewthuh ia ki jingeh jong ki paidbah ba dei na kane ka dawa ka sorkar ka wad ki lad ki lynti kumno ba kane ka jingpynjari ia ka korphiw kan ym ktah ia ki paidbah bad kham tam eh ia ki nongrep kiba wan dei ia ki marrep ha iewduh.
Haba jubab halor ka jingkwah u nongialam ka liang pyrshah u Dr Mukul Sangma, ba ka jingjia hapoh Ichamati ym dei ban tohkit da u Magistrate hynrei la dei ban aiti sha kiwei, na ka liang jong u myntri rangbah u Cornad u la ong ba ia mynta kin ap shuwa ia ka kaiphot na u Magistrate, hadien ba la ioh ia ka kaiphot kin sa peit kumno ban leh.
Phi don ban ong eiei?