Bthah ka tnad marbam ia ki DC ban pynkhreh, ia ki ban ioh khaw tad

Shillong, 4 Rymphang:
Ka tnad sam marbam ka Food and Civil Supplies ka la bthah ia ki Deputy Commissioner jong ki district ban pynkhreh ia ki kyrteng jong kito ki briew kiban ioh bynta ia u khaw tad na ka skhim Food Security Scheme katkum ka Draft Socio Economic List jong ka tnad Community and Rural Development.
“Ki Deputy Commissioner ha ki katto katne tylli ki district ki la dep sdang ia ka kam ban lum ia ki kyrteng jong ki nongioh bynta.
Hynrei kane ka jingpynkhreh ka lah ban shim por namar ba la don bun ki Block ki bym pat dep ia ka khanasumari ka ioh ka kot ne ka Socio-Economic” la ong u heh sorkar ha kane ka sngi Hatmajai.
Ka khubor sorkar ka la iathuh ba kim lah ban pyntreikam khlem da ioh ia ka kyrteng jong ki nongioh bynta na ka C&RD department.
Mar ia dep ia ki kyrteng kiban ioh bynta, kin sdang noh wut wut ia ka jingsam ia ki marbam katkum ka Food Security Scheme.
Ha kajuh ka por ki heh sorkar, la iathuh ba ka jingshon ia ki kot reshon ka la sdang.
“Ngin sa sam ia ki kot reshon ba thymmai sha baroh kiba thymmai bad kiba rim. Ki nongioh bynta kum ki BPL bad ki AAY kin hap ban leit aiti noh ia ki kot reshon barim ban aid a kaba thymmai”, la ong u heh sorkar.
Lah ban kdew ba ha ka 10 tarik Nailar mynshem snem, u Myntri Rangbah ka jylla u Mukul Sangma u la ong ba ka sorkar kan pyndep ia ka jingpynkhreh ia ka jingthoh khanasumari hapoh hynriew phew sngi.
Ha kine ki shi phew sngi ban wan, yn dn ka jingpynlong ia ka jingkam bad ka jingujor na ka bynta ban pynrung ia ki nongioh bynta ha kane ka skhim.
Ha ka 1 tarik Risaw mynshem snem, u myntri ka tnad sam marbam u Clement Marak, u la ong ba ka Meghalaya kan shim ia ki lad ki lynti ban pyntreikam noh ia ka National Food Security ban pynioh khawtad haduh 80 percent ki paidbah ha nongkyndong bad 50 percent ha jaka sor. U Marak u la ong ia kane haba kren ha ka jingialang jong ki myntri tnad sam marbam ha New Delhi.
Hynrei ka sorkar jylla ka la iakynduh jingeh ha ka jingpyndep ia ka jingdonkam halor kane ka skhim ban pyntreikam ia ka, ha kaba 18,44,000 ngut ki briew ha ka nongkyndong bad 3,12,000 ngut ha jaka sor kin ioh bynta na kane ka skhim.
Kiba ioh bynta na kane ka skhim, kin ioh khaw tad san kilo shi bnai ha ka dor T. 3 shi kilo, T. 2 shi kilo u wheat bad T. 1 shi kilo u millet.