Shillong: Ka Supreme Court mynta ka sngi, ka la bthah ia ka sorkar India, ba kan pynbiang lut ia ki kot ki sla, na ka bynta ban sdang biang ia ka jingtih dewiong hapoh Meghalaya. Halor katei ka phang, ka Supreme Court, ka la ai por hynriew taiew ia ka sorkar India.
Ha ka jingshong bishar jong ki nongbishar, ba kynthup ia U Justice AK Sikri, U Justice S Abdul Nazeer bad U Justice MR Shah, la bthah ruh ia ka sorkar India, ba kan ai jingtip kaba shai bha halor ka jingdon u dewiong, uba dang sah ha ki par, na ka bynta ban sdang noh ka jing shalan ia utei u mar poh khyndew bad la ai por ia ka komiti kaba khlieh ia katei ka kam, ba kan pyntip noh hapoh saw taiew naduh mynta ka sngi, ong ka khubor bad ia katei ka kaiphod, yn ai sha ka sorkar Jylla. Ka Supreme Court, ka khlem buh por satia, na ka bynta ban shalan ia utei u dewiong, uba don ha ki par bad kaba lah ban long lehse, ka rai kaba thew hi, na ka bynta ban bteng noh ka jing shalan dewiong noh nangne shakhmat ha ka Jylla.
Katei ka rai jong ka Supreme Court, ka dei halor ka rai kaba la shim da ka sorkar India, ha ka 10tarik Nailar 2015, lyngba ka tnat mar poh khyndew, kaba la pyllait noh ia ka Meghalaya, na ka ain tih dewiong jong ka India.
Ha kajuh ka por, ka Supreme Court, ka kren sngewkhia ruh haba kynthoh halor ka jing mudui jong U Ma Lber Laloo, ha kaba ka pynsngew ba u dewiong hapoh India, u don bun bah, hynrei, ka kashari, ka lyngngoh, ba ha kano ka dur, pat ba la hap ban thied na shabar, na bynta ki ki jingdonkam jong ka Ri bad ka kashari, ka ong “Kane kam da bha than ia ka Ri hi baroh kawei” ong u nongbishar.
Katei ka rai jong ka Supreme Court, la shim da kito kiba don ha ka kam, ba ka pyni ba la weng noh ia ka jingkhang tih dewiong ha ka Jylla, wat la kan dang shim por sa shibnai ban pynbiang ia ki kot ki sla bad ki jingthoh jingtar, kiba hap ban phah sha ka Kashari, hynrei katei hi ka rai ka la kdew shai, ba yn sa weng noh shen, ia ka jingkhang tih dewiong ha ka Jylla.
Kham mynshwa, lah ban pyn kynmaw ba ka tnat dewiong jong ka sorkar India, lyngba U RP Gupta, Joint Secretary jongka, ka la thoh shithi sha U Shambhu Singh, Joint Secretary (North East), ka tnat kam poh iing jong ka sorkar India, ha ka 10tarik Nailar 2015 bad ha katei ka shithi, la leit rah ia ka mat jong ka rai ka dorbar Jylla, ha ka 23tarik Lber 2015, kaba dawa ia ka sorkar India, ba kan pynmih da ka hukum jong U President, kaba kat kum ka paragraph 12 A (b) jong ka Sixth Schedule, ban weng noh ia ka ain tih dewiong jong ka India, kaba ha u snem 1957 lane The Coal mines (Nationalisation) Act, 1973, halor ka kyndon ba ka hap ha ka jaka jong ki trai shnong jaitbynriew rit paid.
U Gupta, ula kren shai ha katei ka shithi ba katei ka ain Mines and Minerals Development and Regulation, Act 1957 (MMDR), ka lah ban weng noh ia ka kyndon jongka, na ka bynta u dewiong ha Meghalaya, wat la kam lah pat ban rai na bynta kiwei pat ki mar poh khyndew haduh ha kine ki sngi, khlem da ia syllok bad ka tnat kam poh iing ka sorkar India.
La ong shuh shuh U Gupta, ba ka Ministry of Coal ka mynjur ban weng noh ia katei ka ain, kaba ia dei bad ka jingpynhap ia u dewiong hapoh ki ain jongka ha Meghalaya.
Phi don ban ong eiei?