Bthah ka Supreme Court ban pynsted ka NGT ia ka pyrkhing dewiong

Shillong, 9 Rymphang:
Ka Division Bench jong ka Supreme Court ka la pynmih ia ka hukum da kaba bthah ia ka National Green Tribunal (NGT) ban pynsted noh wut wut ia ka kam ha kaba iadei bad ka kam khang tih dewiong ha kane ka jylla.
Ia kane ka hukum jong ka Supreme Court la pynmih ha kane ka2 taiew Rymphang da u Chief Justice of India (CJI) U HL Dattu bad u nongbishar AK Sikri hadien ba la ujor da u Bah Lber Laloo.
Haba pynmih ia kane ka hukum, ka Supreme Court ka la ong ba namar ba kane ka hukum ka long kaba shipor, kam don jingmut ban ujor pyrshah ia ka hukum ka NGT bad na kata ka daw, ka dei tang ban shu pynsted ia ka kam.
U Bah Laloo haba thep ia ka jingujor sha ka Supreme Court halor ka jingkhang tih dewiong ka NGT, ha ka jaka jong ki trai par dewiong, u la pan ia ka jingtuklar ka Supreme Court ban pynlait na ka hukum ka NGT ha u bnai Jylliew mynshem snem.
“Nga la ujor sha ka Supreme Court ban pynlait ia ka jingkhang tih deiwong ka NGT namar ba ka jylla jong ngi ka dei kaba Scheduled Area. Ngim thikna ia ka rai ka ban mih aiu ka NGT kan pynmih”, la ong u Bah Laloo haba kren mynta ka sngi, sha ki nongthoh khubor.
U Bah Laloo uba la synran lang ki malik dewiong kynthup u Bah Agustine Shanpru uba dei ruh u president ka Meghalaya Commercial Truck Owners and Operators Association (MCTOOA), Pynskhemborlang Sawian, T War Dkhar, bad u Bah Madal Sumer.
U la ong ba ka Supreme Court ka la kyntait ia baroh ki jingujor jong kiwei halor kane ka kam khang tih dewiong ha ka Meghalaya bad ka la pdiang tang ia ka jingujor jongu.
“Ka Kashari Supreme Court ka la sngap ia ka jingujor jong u nongiasaid ain jong u Bah Laloo bad ka la ong ba baroh ka hukum jong ka NGT ka long kaba tang shi por”, la ong u Bah Shanpru.
Ngi sngew ba ka Supreme Court hadien ba la sngap ia ka jingiasaid jong u riewain jong u Bah Lber Laloo bad ki jingshisha, ka la bthah ia ka NGT ba kan pynsted ia ki kam jongka baroh ha kane ka jylla”, la iathuh u Bah Shanpru.
Katkum ka jingong jong u Bah Shanpru, ka Supreme Court ka la pynmih ia kane ka hukum kaban iarap ia ki nongkhaii bad trai par dewiong ha kane ka jylla.