Bthah ka SCPCR ban thaw ka DHS ia ka Board ki doktor

Shillong, 13 Rymphang:
Namar ka ju jia bunsien ba kiba shah kem ki ju ud pang, ka State Commission for the Protection of Child’s Right (SCPCR) ka la bthah ia ka Directorate of Health Services (DHS) bad kumjuh ruh ia u Superitendent ka Civil Hospital Shillong ba kin thaw ia ka kynhun ne ka board jong ki doctor ban peit bniah ia ka jinglong jingman ka koit ka khiah ki ba shah kem kumjuh ruh ki koidi bad dei ban phah ruh ia ka jinglap jong ki sha ka Commission.
Katei ka jingbthah ka SCPCR ka dei hadien ba u Manager ka Marvelene Inn u Edmund Paul Khar-ir u la shah kem hynrei u la ud pang bad u thiah pang ha Civil Hospital, Shillong. Ka kong Meena Kharkongor Chairperson ka State Commission for the Protection of Child’s Right (SCPCR) ka la ong ba sngewkhia halor katei ka jingleh ki nongshah kem bad ka la ong ba ka dei tang ka buit ba pynslem ia ka jingtohkit. Ka la iathuh ruh ba ka la ia kynduh ia u DHS bad Superitendent ka CHS ha kaba ki la mynjur ban leh ia kane bad shen kin sa thaw noh ia ka Board ki doktor, ka la ong ba ka la ai ruh da ka jingthoh ha ka jingiakynduh mynta ka sngi.