Bthah ka High Court ia ka Dorbar Shnong Mawsynram ban pyrkhat biang halor ka rai khang Yatra sha krem Mawjymbuiñ

Shillong: Ka kashari Meghalaya High Court mynta ka sngi Palei ka la bthah ia ka dorbar shnong Mawsynram ban shong pyrkhat biang halor ka rai jong ka dorbar shnong ban nym shah ia ka kynhun Yatra Pilgrimage ban leit leh niam ha ka krem Mawjymbuiñ.

Ka Kashari kaba la shim bishar mynta ka sngi ia ka mukotduma ba la mudui da ka kynhun Yatra halor ka rai jong ka dorbar shnong, bad ia kane ka mukotduma yn sa shnong bishar biang ha ka 14 tarik mynta u bnai.
U nongiasaidain ba mihkhmat ia ka Dorbar Shnong Mawsynram, u bah VGK Kynta u la ong ba u nongbishar u kwah ban pynbeit da kaba suk ba saiñ, bad u la bret sha ka dorbar shnong ban bishar bha ia ka kam, bad ka dorbar shnong kan shong ban bishar halor kane ka kam da kaba iasyllok lang bad kiwei kiba don bynta.

U la ong ba ka Kashari ka khlem pynslem ban shong bishar biang ia kane ka kam, bad ha ka 14 tarik mynta u bnai kan shong bishar biang ha ka por mynstep, bad ka dorbar shnong ha katei ka sien shong bishar kadei ban leit rah ia ka rai.
U la ong ba ka Kashari ka sngewthuh ia ka jinglong trai bad jingdon hok jong ka dorbar shnong halor katei ka jaka, bad ka la bret sha ka dorbar shnong ban bishar.

Hadien ka jingmudui mukotduma namar ka jingbym ioh jingbit ban pynlong ia ka Yatra Pilgrimage ki riewngeit Hindu, da kaba iaid kjat shaduh ka krem Mawjymbuiñ ha Mawsynram, ka kynthun Yatra ka la mudui noh da ka mukotduma, bad mynta ka sngi Palei na ka liang ka Kashari ka la kala khot hajir ruh ia ka Deputy Commissioner bad ia u Superintendent of Police ka East Khasi Hills.

Lah ban kdew dang shen, ba ka dorbar shnong Mawsynram ka pynpaw ba kam ai jingbit ia ki riew ngeit Hindu ba kin pyllong ia ka jingmane blei ha u Mawjymbuin namar ba ka dei beit tang na bynta ka kam jngohkai.