Bthah ka DCA ïa ki ADC, ban pyndep kloi ïa ka phiah konstitwensi

Shillong:U Symbud Myntri Rangbah ka Jylla ba khmih ïa ka Tnat District Council Affairs (DCA) u Bah Prestone Tynsong ha ka sngi Thohdieng, ula pyntip ba ka Sorkar Jylla, ka la bthah ïa ki Autonomous District Council (ADC) ha Ri-lum Khasi bad Jaiñtia ba kin pyndep noh ïa ka jingphiah thymmai ïa ki constituency kham kloi kat kaba lah.

Haba ïakren bad ki nongthoh khubor, u Bah Prestone ula ong ba dang shen u Lat ka Jylla, ula thung ïa ki Delimitation Committee jong ki artylli ki ADC – ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC).
“Mynta, ki la ïaid shaid shaid ha ka jingpynbeit ryntih ïa ki constituency. Ka Sorkar Jylla ka la bthah ruh ïa ki ba kin pynsted noh wut wut khnang ïa ka elekshon MDC ban wan, yn pynlong noh na ka bynta ki constituency thymmai ym shuh kiba rim,” ula ong.

U Symbud Myntri Rangbah ula ong pat ba kane ka jingphiah constituency kam mut ba ki seat jong ki artylli ki ADC kin nang bun namar “Kane ka dei ka kam ba hap leh kat kum ka Riti Synshar”.
“Ïa mynta hi, ki artylli ki ADC ki kwah ban pynbeit thymmai namar ki don ki constituency kiba heh palat ïa ka MLA constituency. Namar kata, ngi la kyntu jur ruh ba kin pyndep noh kham kloi kat kaba lah ïa ka kam,” ula ong.

Halor ka kam ba ïadei bad ki khyrdop beaiñ, u Bah Prestone ula ong ba ka Sorkar Jylla kala dep pynsangeh ïa baroh ki khyrdop beaiñ hapoh ka Jylla.
“Ngi la bthah ïa ki ADC bad ki DC ba ki dei ban khang khyrdep lut ïa kino kino ki khyrdop beaiñ bad ki la leh ruh ïa kane,” ula ong.