Bteng u samla Goldy ban shah thngan

Shillong, 18 Jymmang:
Hadien ba u CEM barim ka KHADC u Bah Adelert Nongrum u la shah set along hapdeng ka jingshah thngan, u samla Goldy Warjri u ba don iashah thngan lang, u la rai ban bteng beit ban shah thngan khlem buh por.
Une u samla ba 32  snem na  Lumdiengjri, u la ong ”ngan bteng beit ia ka jingshah thngan watla u Bah Nongrum u la shah rah sha phatok”.
U samla Warjri bad u Bah Nongrum ki la sdang ia ka jingshah thngan ha kane ka sngi Saitjain ban pynbor ia ka sorkar ba kan pdiang noh ia ka Village Administration Bill ka KHADC ban pynbor ia ki bor synshar shnong bad ki rangbah shnong.
Kine ki la rai ban shah thngan khlem buh por haduh ba ka sorkar kan pdiang noh ia ka VAB.
U samla Warjri uba don marwei mynta, u shong thngan ha u dur mot jong u Kiang Nangbah uba don ha surok bah hajan Shillong Civil hospital, Shillong.