Bteng ki bor Distrik ban jurip ia ki briew nabar

Nongpoh: Da kaba pyr khing ia ki briew kiba nabar bad kiba thmu shapoh ka jylla bad kaba long ruh kum kawei na ki lad ban tehlakam halor ka jingsaphriang u khniang jingpang Corona Virus ne u (COVID-19), ki Bor Distrik ka Ri Bhoi, ha ryngkat ka jingialang ki briew na ka koit ka khiah lem bad ki Pulit, ki la iai bteng ban jurip ia ki briew kiba nabar bad kiba thmu ban rung shapoh ka jylla Meghalaya.

Katei ka jingjurip ia ki briew nabar bad kiba la thmu ban sdang ban rung shapoh ka jylla, ka dei kaba la sdang naduh myn shisngi bad ha kine ki ar sngi ba la jurip ia ki briew nabar, ki la don da ki hajar ngut ki briew kiba dei ki nongwan shang pyrthei, kiba la wan na ki jaka bapher bapher, ki la shah pynphai dien trai noh.

Lyngba katei ka jingjurip na ki briew kiba wan na kiwei ki jaka, ki Bor Distrik ka Ri Bhoi, ki la pyndonkam ruh da ki tiar kiba lah ban thew ia ka jingshit jong ki nongleit nongwan, namar na bynta jong kito kiba la tam ka jingshit, ki Bor kiba peit ha katei ka jaka, ki la phah ia ki ba kin phah leit peit khmieh bha ialade, ha kito ki jaka kiba la buh kyrpang da ka sorkar.
Haba kren sha ki Lad Pathaikhubor, u Bah R. Kharbihkhiew, Magistrate ka Ri Bhoi bad uba ka sorkar ka la buh ia u ba un long kum u Nongpeit ha katei ka jaka, u la ong ba ia katei ka hukum ban jurip ia ki briew ba nabar, ka la lyngba ka hukum ka Deputy Commissioner ka Ri Bhoi bad kaba la wan lyngba ka sorkar jylla.

U la iathuh ruh, ba ha kitei ki arsngi ba la pynlong ia katei ka jingjurip ia ki briew nabar, ki la don da ki hajar ngut ki nongshang pyrthei kiba thmu ban rung shapoh ka jylla, ki la shah pynphai noh.U la iathuh ruh, ba lyngba katei ka jingjurip, la lap ba ki la don bun ki samla pule napoh ka jylla, kiba dang wan na kiwei ki pat ki jylla jong ka Ri, kumta haba iadei bad kitei ki samla, na ka liang ki briew kiba don ha katei ka jaka, ki la kyntu ia ki ba ia kaba mynta ki hap ban long marwei bad ban kiar na kaba iajan ia ki briew ne kiba ha iing ha ka jaka kaba ki sah.